په کابل کې حکومتي ذرائعو ویلي دي چې د لوجسټیکي مسایلو له امله په دوحه کې بین الافغاني مذاکرات یو څه ځنډېدلي او د افغان دولت مذاکراتي هیئت لا تر اوسه په کابل کې پاته دی.
بین الافغاني مذاکرات په میاشتو میاشتو وځنډېدل، او په مبینه توګه، لامل یې د طالب قیدیانو د خلاصون پر سر اختلافات و، خو افغان حکومت د پنځه زرو نه زیات طالب بندیان آزاد کړل او په وروستیو جنجالي قیدیانو باندې اختلافات هم له منځه ولاړل، چې په دې سره مذاکراتو ته لاره هواره ښکاره شوه.
د افغانستان نایب صدر امرالله صالح د اتوار/یکشنبې په ماخوستن یو خصوصي ټي وي، طلوع نیوز، سره په مرکه کې وویل، هغه وروستي شپږ تنه جنجالي بندیان چې ځینو بهرنیو ملکونو یې د آزادېدو په اړه اندېښنې درلودې، د هغوی په اړه دا فیصله شوې چې هغوی به قطر ته منتقل کیږي مګر له هغه ځایه به بل کوم هېواد ته د تګ اجازه ونلري.
صالح دا هم وویل چې اوس له طالبانو سره د مذاکراتو په پروټوکولونو بحث روان دی، لکه دا چې په مذاکراتو کې به چا ته څه ډول القاب کارول کیږي، چا ته به د خبرو کولو موقع ورکول کیږي، د مذاکراتو په ځای کې به کوم بېرغ اېښودلی وي، او داسې نور. خو هغه وویل چې د افغانستان د جمهوریت پلاوی د تېرې جمعې ورځې راهیسي خبرو ته آماده دی او اوس د طالبانو وار رارسېدلی چې آماده ګي څرګنده کړي.
د صدر محمد اشرف غني مرستیال امرالله صالح دا هم وویل چې افغان دولت د مذاکراتو د ژر پای ته رسولو بېړه نلري بلکې غواړي مذاکرات یوې ښې نتیجې ته ورسیږي، که په یوه ورځ وي او که په اوږده موده کې.
هغه زیاته کړه: "موږ مذاکرې په اوونیو، میاشتو او ورځو پورې نه مُقید کوو، زموږ د عزت بحث دی. که مذاکرې د با عزته سولې سبب کېږي، په یوه ورځ مخ ته ځو که موده وغځېده موږ د چا مهال وېش پر ځان نه شو تپلی."
طالبانو د دې مذاکراتو نه وړاندې، پخپل مذاکراتي ټیم کې ژور بدلونونه راوستل او عبدالحکیم حقاني یې د خپل مذاکراتي پلاوي مشر وټاکه. د دې ټیم مشري پخوا د شیر محمد عباس ستانکزي په غاړه وه چې پس له دې به هغه د مذاکراتي هیئت مرستیال پاته وي.
طالبانو همدارنګه د قطر دفتر د پخواني ویاند سهیل شاهین پر ځای د ډاکټر نعیم وردګ په نوم یو کس د قطر دفتر ویاند ټاکلی دی.
بل خوا اسوشېټډ پرس خبري اژانس د ځینو طالب سرچینو په حواله ویلي چې د طالبانو پلاوی پاکستان ته تر سفر وروسته له افغان حکومت سره د خبرو پیلولو لپاره د خالي/ شنبې په ورځ بیرته دوحې ته رسېدلی دی.
په همدې حال کې د افغانستان د سولې دپاره د امریکا خاص استازي زلمي خلیلزاد د بین الافغاني خبرو د ژر پېلېدو دپاره قطر ته سفر کړی دی.
کابل د یورپي اتحاد د دریځ ملاتړ وکړ
یورپي اتحاد او کېنېډا په طالبانو غږ کړی چې سمدستي دې په افغانستان کې ډزبندي وکړي. د افغانستان خارجه وزارت د یو بیان په جاري کولو سره، په افغانستان کې د یورپي اتحاد د استازولۍ او د کینېډا د سفیر دغه ګډ بیان ستایلی او هرکلی یې کړی دی.
د یورپي اتحاد او کېنېډا په بیان کې له طالبانو غوښتل شوي چې د افغانستان د خلکو غوښتنې ته احترام وکړي او د ملګرو ملتونو د سکرېټري جنرل او د ملګرو ملتونو د امنیت شورا د غوښتنې په خیال کې ساتلو سره دې سمدستي بدون د قید او شرطه، په ټول افغانستان کې سرتاسري ډزبندي وکړي.
په بیان کې راغلي چې ټول افغان سیاسي قوتونه دې د مخ ته راغلې موقع نه د یوې دوامداره سولې دپاره ګټه پورته کړي او پرته له ځنډه دې بین الافغاني مذاکرات پیل کړي. بیان زیاتوي چې افغانستان د یوې "دوامدارې، منصفانه، او ټول شموله" سولې مستحق دی.
په بیان کې راغلي، "په بین الافغاني مذاکراتو به زمونږ نظر وي چې دا مذاکرات د روغې جوړې، یو بل منلو، او ټول شموله روحیې سره مخ ته ولاړ شي، د ښکېلو اړخونو او د ټولنې د استازو ترمنځ یو منصفانه ډائیلاګ وي، او په کې د افغانستان د اسلامي جمهوریت د اساسي قانون (آئین) او ادارو درناوی وشي، او همدا راز د افغانستان د نړېوالو تعهداتو یا ژمنو تداوم هم وساتل شي."
د بیان په وروستنۍ برخه کې راغلي، "په افغانستان کې د طالبانو په شمول د سیاسي قوتونو له خوا د نن ورځې پرېکړې او ګامونه به د نړېوالې ټولنې د سبا ورځې پرېکړې او ګامونه روښانه کړي."
د یادولو وړ ده چې د بین الافغاني مذاکراتو پیل، په قطر کې د طالبانو او امریکا د لوظنامې یوه له څلورو مهمو برخو ځیني وه او په اول کې تمه وه چې دا خبرې د مارچ په میاشت کې شروع شي، خو د قیدیانو د خلاصون پر سر جنجالونه اوږده شول او دا خبرې تر اوسه څو څو ځله ځنډېدلي دي.