د افغانسستان د ځوانانو د کرکټ الف لوبډلې «افغان ابدالیان» د ایمرجینګ اېشیا کپ سیالیو په دویمه نیمه پایلوبه یا سېمي فاینل د هندوستان الف لوبډلې ته په 20 منډو ماتې ورکړه او ددې ټورنمنټ پایلوبې یا فاینل ته ورسېد.
افغان ابدالیانو د پچې یا ټاس له ګټلو وروسته لومړی بېټنګ غوره کړ او د څلورو لوبغاړو په زیان یې 206 منډې جوړې کړې او مقابل لوري ته یې د 207 منډو هدف وټاکه.
د هند الف لوبډلې په جواب کې په ټاکل شویو 20 اورونو کې د اوو لوبغاړو په اوټ کېدو سره ټولې 185 منډې وکړې او لوبه یې وبایلله.
د افغان لوبډلې د بېټنګ اوپنر یا پرانیستونکي صدیق الله اتل تر ټولو زیاتې 83 منډې وکړې، ورپسې زبید اکبري 46 او کریم جنت 41 منډې وکړې.
د هند الف لوبډلې لپاره رامنډیپ سینګ ترټولو زیاتې 46 مندې وکړې. د هندۍ لوبډلې یواځینی بریالی بال اچوونکی راسخ سلام وو چې درې افغان لوبغاړي یې وسوځول.
ددې ټورنمنټ پایلوبه یا فاینل به د راتلونکې یکشنبې- اتوار په ورځ د اکتوبر پر 27مه د افغان ابدالیانو او سري لنکا الف لوبډلو تر منځ کیږي.
دا لومړی ځل دی چې افغان ابدالیان د ایمرجېنګ اېشیا کپ ټورنمنټ پایلوبې ته رسېږي.
له لوبې وروسته د افغان ابدالیانو لوبډلې مشر دروېش رسولي او نورو لوبغاړو په یوه ویډیو کې د لوبې پر ګټلو خپلو هېوادوالو ته مبارکي ویلې او وایي بشپړه هڅه به کوي چې پایلوبه هم وګټي.
تر دې وړاندې په یوه بله لوبه کې د سري لنکا الف لوبډلې د پاکستان شاهین لوبډلې ته په لومړۍ نیمه پایلوبه کې په اسانۍ سره ماتې ورکړې وه.
پاکستان د لوبې پچه یا ټاس له ګټلو وروسته لومړی بېټنګ وکړ او د ټولو لوبغاړو په اوټ کېدو یې 135 منډې وکړې، سري لنکا د درو ویکټو په زیان 137 منډې وکړې او نیمه پایلوبه یا سېمي فانیل یې په اوو ویکټو وګټله.