د اسلام اباد يو عدالت د پخواني وزیراعظم او پاکستان تحریک انصاف ګوند مشر عمران خان او د هغه د مېرمن بشرا بي بي ضد د عدت په وخت د نکاح قضيه کې سزاګانې غیرقانوني کړې او د هغو د بري کولو حکم یې وکړو.
د اسلام اباد اډيشنل سيشن جج محمد افضل مجوکا نن په 13مه جولای دغه فيصله واوروله.
د ځايي رسنيو ترمخه، عدالت وويل که عمران خان او بشرا بي بي په کومه بله مقدمه کې مطلوب نه وي د جېل څخه دې خوشي کړل شي.
د تحريک انصاف ګوند چيرمېن بېرسټر ګوهر د فيصلې وروسته مطبوعاتو سره خبرو کې وويل، "نن د حق او انصاف فتح وشوه، په دې فېصله عدليې ته سلام وړاندې کوو، دا يوه بې بنياده قضيه وه"، هغه وويل، نن د عمران خان خوشي کېدل پکار دي دا د هغه پرضد وروستۍ قضيه وه .
د عدت په وخت د نکاح په قضيه کې په درېمه فرورۍ سېول جج قدرت الله، عمران خان او بشرا بي بي ته د اووه، اووه کالو بند او پينځه، پينځه لکه روپو جرمانې سزا اورولې وه.
تېر کال د نومبر په مياشت کې د بشرا بي بي پخواني مېړه خاور مانيکا د اسلام اباد د سېول جج قدرت الله عدالت ته خواست کړی وو او ويلي يې وو، د عمران خان او بشرا بي بي نکاح د عدت وخت پوره کېدو نه مخکې شوی وو او په دواړو یې د ناجايزه تعلقاتو تور لګولی وو.
خاور مانیکا د سېول جج قدرت الله په عدالت کې د شکایت سره سم خپل بیان هم ثبت کړی او د عدالت نه یې غوښتي وو چې بشرا بي بي او عمران خان ته سزا ورکړي.
د خاور مانیکا دا درخواست وروسته له هغې مخې ته راغلی چې له دغې وړاندې محمد حنیف نومي یو تن د عمران خان او بشرا بي بي خلاف د غېرشرعي نکاح په مقدمه کې خپل درخواست بیرته اخستی وو.
په ياده قضيه کې عدالت په عمران خان او بشرا بي بي باندې فرد جرم لګولی او وروسته یې ورته سزا اورولې وه.
عمران خان بيا د سېول عدالت فېصله په اډيشنل سيشن کورټ عدالت کې چېلنج کړې او اډيشنل سيشن جج شارخ ارجمند پرې د مې په مياشت کې سزا اوروله خو خاور مانيکا بيا په عدالت بې باوري ښکاره کړې او بیا د اسلام اباد هايکورټ دغه قضيه اډيشنل سيشن جج محمد افضل مجوکا عدالت ته لېږلې او نن پرې ياد جج فيصله واوروله.