د پاکستان د داخله چارو وفاقي وزیر شېخ رشید ویلي دي چې حکومت په تحریک لبېک د بندېز لګولو فېصله کړی ده.
شېخ رشید په اسلام اباد کې د شورو، چهارشنبې، په ورځ خبري غونډې ته وویل چې په تحریک لبېک د پابندۍ فېصله د پنجاب حکومت په سفارش شوې ده.
د داخله چارو وزیر وویل په هېواد کې د ګل - دوشنبې ورځې څخه شروع شوي پرتشدد احتجاجونو کې دوه پولیس مړه او 340 نور ژوبل شوي دي. ای پي خبري ادارې د دوو احتجاج کوونکو د وژل کېدو رپورټ هم ورکړی و.
د وي او ای اردو څانګې د رپورټ ترمخه په لاهور او د پنجاب په ځینو نورو ښارونو کې د قتل، تشدد، تښتولو، وراني او امن ته د زیان رسولو په تورونو د تحریک لبېک د کارکنانو او احتجاج کونکو په ضد د ترهګرۍ د قانون لاندې مقدمات درج کړی شوي او د 1200 نه زیات احتجاج کونکي ګرفتاره کړی شوي دي.
مطبوعاتي رپورټونه وايي د ډلې د مشر سعد حسېن رضوي په شمول د تحریک لبېک د یوشمېر مشرانو په ضد د ترهګرۍ د قانون لاندې مقدمې کړی شوي دي.
شېخ رشید وویل د ترهګرۍ د مخنیوي قانون د یولسم بي یا 11-B مادې د لاندې یاده ډله ترهګر ټاکل شوي ده.
د دغه قانون ترمخه د استخباراتي ادارو یا نورو مصدقه معلوماتو او د حکومتي ادارو د معلوماتو په اساس حکومت کولی شي چې یوه ډله د ترهګرو په نوم لړ کې شامله کړي.
وفاقي وزیر وویل چې د یادې ډلې سره د حکومت کومه وعده شوې وه نو دهغې د عملي کولو لپاره به یې قرارداد پارلیمان ته وړاندې کولو خو د تحریک لبېک مشرانو داسې غوښتنې کولی که په هغې عمل وشي نو د یورپ هېوادونو سره تعلق لرونکي ټول خلک به ددې ځایه لاړ شي.
حکومت د تحریک لبېک سره د ډلې د غوښتنو په اړه یوه لوظنامه کړی وه خو په پاکستان کې یوشمېر سماجي فعالانو او د حکومت مخالف سیاسي ګوندونو مشرانو د یوې سخت دریځې ډلې سره د حکومتي لوظنامې مخالفت کړی و ویلي یې وو چې د ډلې د غوښتنو په پوره کولو به پاکستان په نړۍ کې بدنامه شي.
تحریک لبېک په پنجاب کې په لوې تعداد کې پلویان لري او زیاتره پرتشدده احتجاجونه هم د پنجاب په لاهور، رحیم یار خان، چکوال، شېخو پوره او ګوجرانواله ښارونو کې شوي دي او د صوبايي حکومت دغه ځایونو کې د رېنجر ځواکونه په ځای کړي دي.
خو د کراچۍ او حېدر اباد په شمول د سند صوبې او د هېواد په نورو برخو کې هم د ډلې پلویانو د مظاهرو په وخت لوی لارې تړلی وې.