د پاکستان وزیراعظم شهباز شریف ویلي چې پاکستان کې تېرو حکومتونو د ترهګرۍ ستونزې ته پام نه دی کړی اؤ له ۲۵ کالو راپدېخوا د ترهګرۍ ستونزې سر راپورته کړی دی چې ددې د مخنیوي لپاره به ټولو ریاستي ادارو ته په ګډه خپل کردار ترسره کول وي.
د خالي یا شنبې په ورځ د نیشنل ایکشن پلان د اپېکس کمیټې غونډې ته خپله وینا کې ښاغلي شهباز شریف ویلي، د قامي سلامتۍ مسله د زیاتې مودې راهسې له پامه غورځول شوې وه اؤ نن پاکستان په بیلا بیلو حوالو د ترهګرۍ سره مخ دی.
هغه ویلي چې د جرمونو، منشیاتو اؤ قاچاق د ترهګرۍ سره ژوره اؤ انسان وژونکې اړیکه ده اؤ د ترهګرۍ خلاف جګړه د ټولو ریاستي ادارو ګډ فرض دی.
وزیراعظم د نیشنل ایکشن پلان د ایپکس کمېټۍ دا مهمه غونډه وروسته له هغې رابللې وه چې په دې وروستیو کې په پاکستان کې په امنیتي ځواکونو د ترهګریزو بریدونو لړۍ زیاته چټک شوې اؤ په دې بریدونو کې پوځ، پولیسو اؤ د ایف سي عسکرو اؤ افسرانو ته درانه ځاني زیانونه اوښتي دي.
د پاکستان پوځ ويلي، پرون د جون په 21مه هم د خېبرپښتونخوا په کورمه ضلع کې د سړک په غاړه بمي چاودنه کې پينځه عسکر وژل شوي وو.
سرچېنې وایي نن د خالي په ورځ بیا د خېبر پښتونخوا په کوز دیر سیمه وسله والو په امنیتي ځواکونو برید کړی چې د ابتدایي اطلاعاتو له مخې په دې برید کې دوه د ایف سي عسکر وژل شوي اؤ ګڼ شمیر نور پولیس اؤ د ایف سي عسکر ژوبل شوي دي.
وزیر اعظم شهباز شریف ویلي چې د پاکستان وسله والو ځواکونو د ترهګرۍ په ضد جګړه کې بې مثاله قربانۍ ورکړې دي اؤ امنیت د ریاست یوازې یوې ادارې ته پرېښودل یو خطرناک روش یا عمل دی.
د هغه وینا وه مونږ ټولو ته په ګډه چقول دي اؤ هیله ده چې صوبې به د ترهګرۍ په ضد جګړه کې د خپلې برخې کردار ولوبوي.
ډان ورځپاڼه وایي چې د نیشنل ایکشن پلان د ایپکس کمیټې په غونډه کې د ملک د مجموعي امنیتي صورتحال جاج اخستل شوی اؤ هم پاکستان کې د چین اؤ نورو بهرنیو هیوادونو د وګړو امنیتي چارې ارزول شوي دي.
په دې غونډه کې دپوځ سرلښکر جنرال عاصم منیر ،د څلورو واړو صوبو اعلا وزیرانو ، ګورنرانو، چیف سیکرټریانو اؤ نورو لوړ پوړو چارواکو برخه درلوده.
پاکستان کې د شخړو او امنيت د مطالعاتو څيړنيزې غېر حکومتي ادارې پاکستان انسټيتیوټ فار کنفلیکټ اېنډ سیکيورټي سټډیز (پيکس) ويلي، د مې په میاشت کې په ملک کې د ترهګرۍ پېښې 12 فيصده سېوا شوي او امنيتي ځواکونو 82 جنګيالي وژلي وو.
د روانې مياشتې په درېمه نېټه خپور کړي رپورټ کې پيکس ويلي وو، د اپرېل د مياشتې په مقابله کې په مې کې ترهګري سېوا شوې او وژنو کې هم 29 فيصده اضافه ليدل شوې وه.
په رپورټ کې د مې په مياشت کې په ملک کې د 86 ترهګرو پېښو ويل شوي، 90 کسان پکې وژل شوي چې پکې 48 ملکي وګړي، 22 امنيتي ساتونکي او 20 جنګیالي شامل وو.
پيکس ويلي وو، د مې په میاشت کې د پاکستاني پوځ، نورو امنیتي ادارو او پولیسو د کارروايانو په وخت 70 کسان وژل شوي، 62 پکې جنګيالي او اته د امنيتي ځواکونو غړي شامل وو. د رپورټ ترمخه د مې په مياشت کې په مجموعي ډول 82 جنګيالي وژل شوي، 62 پکې د امنیتي ځواکونو په عملیاتو او 20 د حملو په وخت ځوابي عملياتو کې وژل شوي وو.
پيکس ویلي وو، په تيرو اووه کلونو کې د جنګیالو د وژنو دا شمېره په کومه يوه میاشت کې تر ټولو زياته شمېره وه. په رپورټ کې ويل شوي د مې په مياشت کې په 86 پېښو کې 33 په پخوانۍ فاټا، 24 په خېبرپښتونخوا او 23 په بلوچستان کې شوې وې. پخوانۍ فاټا کې 30 کسان، خېبرپښتونخوا کې د ورګډو ضلعو نه علاوه نورو سيمو کې 37 کسان وژل شوي، او ټول 64 کسان ژوبل شوي وو.
پيکس ويلي وو، د روان کال (2024م) په لومړو پينځو مياشتو کې په ملک کې د ترهګرۍ ټولې 409 پېښې شوې، 414 کسان پکې وژل شوي او 474 ژوبل شوي وو.