د سويډن چارواکو د زیارت، پنجشنبې، په ورځ داعش وسله والې ډلې سره تړون لرونکې په یوې ښځې په شام کې د مبینه نسل وژنې، د انسانیت خلاف جرمونو او د یزیدي ښځو او ماشومانو خلاف د سنګینو جنګي جرمونو الزام ولګولو.
دوه پنځوس کلنه لینا لاینا اسحاق د سويډن شهري ده او وړمبۍ ښځه ده چې په دغه الزاماتو به په عدالت کې د مقدمې سره مخامخ کېږي.
په اسحاق د لګول شویو الزاماتو ترمخه، هغې د کال ۲۰۱۴ نه تر د ۲۰۱۶ پورې د شام په رقه ښار کې په مبینه توګه دغه جرمونه کړي دي.
د فرات دریاب په ساحل د شام رقه ښار د اسحاق د مبینه جرمونو په مهال د هغه خلافت مرکز و چې داعش د شام او دعراق په ځینو سیمو کې اعلان کړی و.
د سويډن سرکاري وکېلې یا څارنوالې رینا دیوګن په یو بیان کې وویل د اسحاق جرمونو د داعش د واک اختیار لاندې په رقه کې ترسره شوي او دا وړمبی ځل دی چې په یزيدې مېرمنو د حملو په لړ کې په سویډن کې په چا مقدمه چلول کېږي.
په اسحاق د لګول شوي فرد جرم ترمخه په یزیدي ښځو د حملو هدف په مکمله او یا په جزوي توګه دا قوم ختمول وو.
په کال ۲۰۱۴ کې د داعش وسله والو د شام او د عراق په سنجار سیمه کې د یزیدیانو په کلیو او بانډو یرغل وکړو او ښځې او ماشومان يې وتښتول. یزیدي ښځې په جنسي غلامۍ مجبوره کړی شوې او یزیدي هلکانو ته به جهادي نظریات ورښول کېدل.
د دې نه مخکې د سویډن یو عدالت اسحاق ته په دې جرم درې کاله د قېد سزا اورولې وه چې په ۲۰۱۴ کې يې خپل دوه کلن زوی په شام کې د داعش د واک اخیتار لاندې سیمې ته بوتللی و. هغې خاوند ته يې ویلي وو چې د زوي سره ترکي ته سېل ته ځي خو چې ترکي ته ورسېده نو بیا مور او زوی د شام هغه سیمې ته ورغلل چې د داعش د ولکې دلاندې وه.
په کال ۲۰۱۷ کې چې د داعش زوال شروع شو نو اسحاق د رقه نه وتښتېده خو د شام کرد ځواکونو ونیوله. هغه په څه نه څه طریقه د کرد خواکونو د ولکې نه وتلو کې کامیابه شوه او ترکي ته ورسېده خو په ترکې کې د خپل مخکني زوي او د دوو نورو ماشومانو ترڅنګ ګرفتار کړی شوه. د هغې دوه ماشومان په شام کې د تیونس د یو وسله وال سره د واده نه شوي وو. ترکي اسحاق بیا سويډن ته وسپارله.
د سویډن عدالت وویل په اسحاق د لګول شویو الزامات په سر مقدمه به د اکتوبر په اوومه نېټه شروع کېږي او قریباً دوه میاشتې دوام لري. د مقدمې زیاتره اورېدنه یا سماعت به د تړل شویو دروازو په شا کېږي.