په خېبر کې د پي ټي ایم لخوا رابلل شوې قامي جرګې ته دخ ېبر پښتونخوا اؤ د ملک د نورو بیلابیلو برخو نه په زرګونو خلک د جرګې میدان ته ورټول شوي اؤ د جرګې منتظمین وایي چې په لږو شیبو کې به دا درې ورځنۍ جرګه په رسمي ډول پيل شي.
د سیمې نه د ډيوه خبریالان وایي چې د جرګې میدان کې د هرې ضلعې د خلکو لپاره بیلا بیلې خیمې لګول شوي اؤ یوه ستره خیمه د عامو میلمنو لپاره لګول شوې ده.
د پي ټي ایم رضاکارانو د جرګې لپاره د امنیت اؤ تنظیم چارې پخپل لاس کې نیولي اؤ د ډيوه خبریالان وایي چې جرګې ته د ورتلونکو کسانو پر مخ ټولې لارې خلاصې دي اؤ ډلې ډلې خلک اؤ سیاسي مشران د جرګې میدان ته ور روان دي.
د جرګې منتظیمینو ډیوه ته ویلي چې د پولیسو لخوا د جرګې په منتظیمینو د پرله پسې چاپو اؤ بریدونو له امله دوي په ټاکلي وخت هغه انتظامات ونه کړل شول چې د جرګې لپاره یې په نظر کې نیولي وؤ خو وایي چې اوس یې هم په بیړه بیړه ټول کارونه سرته رسولي اؤ امکان دی چې د جمعې په مازیګر یا ماښام به جرګه په رسمي ډول پيل شي.
د جرګې د منتظیمینو په وینا جرګه ګې به وړومبی د پښتنو په خاوره د پېښو ستونزو په اړه سیاسي مشران، پوهان اؤ د بیلابیلو تپو یا طبقو استازي خبرې کوي اؤ بیا به د هر سیاسي ګوند اؤ هرې طبقې نه یوه کمیټي وټاکل شي اؤ په دغه کمیټي کې به د ټولو ګوندونو، تنظیمونو ، زده کوونکو اؤ نورو څانګو یو، یو استازی شامل وي .
منتظمین وایي چې دغه کمیټۍ ممکنه غړي به تر ۸۰ پورې وي اؤ هغوي به بیا پښتنو ته د ورپېښو ستونزو د هواري لپاره یوه مربوطه تګلاره ټاکي اؤ دغه تګلاره بیا د پي ټي ایم اؤ ټول پښتون وطن شریکه تګلاره وي اؤ د هغې عملي کولو لپاره به ګامونه اخلي.
د پاکستان حکومت په پي ټي اېم باندې د اکتوبر په شپږمه بندیز اعلان کړی، د تحریک طالبان پاکستان او افغان طالبانو سره د اړيکو او بهر هيوادونو څخه د پيسو اخستو تورونه یې پرې لګولي وو.
د پي ټي اېم مشر دغه ټول تورونه په کلکه رد کړي او د ثبوت وړاندې کولو غوښتنه یې کړې وه.
خېبر ضلعه کې د جرګې دپاره د څو ورځو نه تياريانې روانې وې، خو په نهم اکتوبر پولیسو د جرګې په ځای عمليات کړي، اوښکی بهيونکی ګېس یې پرې ورورولی او ډزې یې کړې وې.
په يادو ډزو کې د خېبرپښتونخوا د وزيراعلا علي امين ګنډاپور په وينا، د پي ټي اېم څلور فعال وژل شوي او لس ژوبل شوي وو.
له دغې وړاندې هم دوه ځله د جرګې د خلکو لرې کولو هڅه شوې وه.
د پي ټي اېم ضد عملياتو په اړه د خېبرپښتونخوا حکومت ويلي وو، د مرکزي حکومت په وينا هر څه شوي دي.
پرون بيا د وزیراعلا علي امين ګنډاپور په مشرۍ د پي ټي اېم ضد عملیاتو وروسته د مشورې دپاره جرګه شوې، د کورنيو چارو وزير محسن نقوي د صوبې ګورنر او د سياسي ګوندونو مشرانو او استازو پکې ګډون کړی او د هغې وروسته وزيراعلا ويلي، جرګې ورته د پي ټي اېم سره د خبرو واک ورکړی دی.
وزيراعلا بيا ورغلی د پي ټي اېم منظور پښتين سره یې ليدلي، او دواړو بيا مطبوعاتو سره خبرو کې ويلي، جرګه به په خپل ځای او خپل ټاکلي وخت کيږي. وزیراعلی په پي ټي ایم باندې د بندیز لګېدو مخالفت کړی دی.
منظور پښتين وويل، د پښتنو جرګه به په پرامنه توګه کيږي، کوم کسان چې وژل شوي د هغو دپاره دعا وشوه او ټول خلک پرې خفه دي. هغه زياته کړه، دلته د دې وطن د حقونو او جرګو په حواله خبرې وشوې.
وزير اعلا وويل، دی به د جرګې کوربه وي او چې جرګې کومې غوښتنې وړاندې کړی هغه به پرې په هر ځای کې خبره کوي.
هغه زياته کړه، د جرګې هيڅ شرطونه نه دي اېښودل شوي، دوی د جرګې کامیابي غواړي، چې دا ټول عمل په خېر ترسره شي.