د امریکا منتخب ولسمشر جو بایډن د سې شنبې په ورځ وویل چې هغه د تیرې اونۍ د ټاکنو د نتیجو وروسته ولسمشر ډونالډ ټرمپ د نه منلو یا د ټاکنو د پایلو څخه انکار کولو په اړه اندېښنه نلري. خو وايي چې دا کار د ټرمپ او هیواد لپاره شرم دی.
ټرمپ د نومبر درېيمې په انتخاباتو کې د درغليو بې بنياده دعوې کړي دي.
بایډن په ویلمینګټن ډلاوېر کې، چیرې چې هغه د جنوري په شلمه نیټه د خپل واک انتقال په اړه کار کوي خبریالانو ته وویل:
"زه فکر نه کوم چې دا کار به د ولسمشر ټرمپ سره کومه مرسته وکړي."
ټرمپ د نومبر درېيمې په انتخاباتو کې د درغليو دعوې کړې دي او په څو ایالتونو کې یې له لسګونو ډیرې قضیې ثبت کړي چې د بایډن اټکل شوي ټاکنو بریا شنډه کړي.
بايډن وويل چې د واک د انتقال پروسه په ښه ډول روانه ده او د دې سربېره چې ټرمپ د انتخاباتو نتيجې لا نه دي منلي او ځینې رېپبلېکنس یې بريا نه مني خو د ده په خبره، دا به د دوی په پلان او په هغه څه چې دوی يې له دې وخته د جنورۍ تر ۲۰ مې پورې د کولو جوګه دي، ډېر اغېز ونکړي.
د عمومي خدماتو اداره چې د امریکا یوه حکومتي اداره ده د بایډن اټکل شوي بریا د تصدیق کولو څخه ډډه کړې. دا کار د بایډن چارواکي په فډرل ادارو کې د دفتر ځای نیولو، د حکومتي ایمېل اډرسونو سپارلو او د واک انتقالولو پروسې لپاره د فډرل پیسو ترلاسه کولو مخه نیسي. خو جوبایډن دا خبره د اندیښنې وړ نه ده بللې.
د امریکا له اساسي قانون سره سم د ۲۰۲۱م د جنورۍ پر ۲۰مه به د امریکا نوی ولسمشر د خپلې دندې لوړه وکړي او رسماً کار پیل کړي.
ټرمپ د نومبر پر ۱۰مه هم بې ثبوته دعوو ته دوام ورکړ او ویې ويل چې د ووټونو په شمېرلو کې پراخې سرغړونې شوي دي.
نوموړي پر خپل ټوېټر لیکلي چې کېدای شي چې اخر انتخابات دی وګتي.