د کراچۍ په تين تلوار د هندو او نورو لږکيو سره تعلق لرونکو او مدني فعالو د سيند صوبې په کندکوټ سیمه کې د تښتول شوو هندوانو راخوشي کولو دپاره احتجاج کړی او سړک یې بند کړی وو. وروسته بيا د کورنیو چارو نګران وزير ویلي، دوه تښتول شوي هندوان راخوشي کړی شوي او نور به هم خوشي کړي.
پرون د اتوار په مازيګر د کراچۍ په تين تلوار د هندوانو سره د نورو لږکيو غړي او مدني فعال راټول شوي، د سيند صوبې په کندکوټ، کشمور کې د تښتول شوو هندوانو راخوشي کولو غوښتنې یې کولې.
د احتجاج کوونکو په وينا د هندو ټولنې پینځه کسان د کندکوټ غلو تښتولي او د کروړونو روپو تاوان ترې غواړي.
په احتجاج کې شريک ډاکټر ونيج کمار وي او اې ډیوه ته وويل، دوی ځکه راټول شوي چې په کشمور کندکوټ کې، د خلکو تښتونې، غلاګانې ډاکې ډېرې سېوا شوي دي.
هغه زياته کړه، دوی د ټولو تښتول شوو کسانو راتښتولو او امنيت غوښتنه کوي.
او مدني فعالې فعالې شيما کرماني وويل،"د سيند د کشمور ضلعې او ورسره خواوشا سيمو نه د تيرو څو مياشتو راهسې د تاوان دپاره د غريبو خلکو تښتول پېل شوي دي، ښکاري چې د يوې منصوبې لاندې يا سازش سره د امنيتي ځواکونو په ملاتړ دغه کار راوان دی".
مظاهره چيانو په پوليس تور پورې کړی چې د غلو او د تښتول شوو کسانو د کورنيو تر منځ د منځګړي کردار ادا کوي او هڅه یې ده چې د تاوان په روپو دغه معامله هواره کړي.
د احتجاج کوونکوپه وينا د تېرو درېو ورځو راهسې په کشمور کې د هندو لږکيو احتجاجي پرلت روان دی خو څوک یې غږ نه اوري او نه ورته د پاکستان په مطبوعاتو کورېج ورکول کيږي.
د شپې ناوخته بيا په صوبه کې د نګران حکومت د کورنيو چارو وزير [ريټايرډ بريګيډير] حارث نواز او د کراچۍ مېر مرتضا وهاب په تين تلوار کې د احتجاج کوونکو څنګ ته ورغلي او د کورنيو چارو وزير ويلي، دوه تښتول شوي کسان یې راخوشي کړي او دوه نور به په 12 ساعتونو کې راخوشي کړي.
"ډاکټر مونيج نیاج او ساګر کمار راخوشي کړی شوي، پاتې دوه نور به هم راخوشي کړی شي".
د نوموړي وزير د باور وروسته احتجاج ختم کړی شوی دی. خو احتجاج کوونکو دعوه کړې د ټولنې پينځه کسان یې تښتول شوي دي.
د پاکستان په سيند صوبه کې د پنجاب او بلوچستان صوبو سره په پوله پرتې پراخه سيمې کچه نومې علاقې څخه د اوږدې مودې نه داسې خبرونه مخې ته راځي چې دغلته ډاکوان د تاوان دپاره خلک تښتوي.
د سيند صوبې پوليس دعوه کوي، د اپرېل د میاشتې راهسې د غلو ډاکوانو پرضد عمليات دوام لري.
د احتجاج نه وړاندې حارث نواز مطبوعاتو سره په خبرو کې ويلي وو په شکار پور او جېکب اباد [کچې علاقه] کې د استخباراتو په اساس د عملياتو تياری شوی او زر به دغلته په غټه کچه عملیات وشي.
د جون او جولايۍ په میاشتوکې د خېبرپښتونخوا د ټانک سيمې خالد خان بېټنی او اېډوکيټ/وکيل حکمت الله مسيد غلو تښتولی وو، وروسته بيا د دوی د راخوشي کولو دپاره په غټه کچه احتجاجونه شوي او له هغې وروسته راخوشي کړی شوي وو.
Forum