د پښتونخوا په قبايلي سيمه شمالي وزيرستان کې د امنيتي ځواکونو په يو چيک پوسټ بريد کې د پاکستاني پوځ درې امنيتي عسکر وژل شوي دي. دغه برید چې ناپېژاندو وسلوالو کړی د سیمې په امنیت یې نیوکې او اندېښنې راپارولي دي.
د سیمې امنیتي سرچينې وايي بريدکوونکو د پنجشنبې- زیارت په سهار شمالي وزیرستان په ګړیوم سیمه کې د امنیتي ځواکونو په پوسته بريد پيل کړى چې بریدګر امنیتي عسکرو د سخت زیان په رسولو بریالي شوي دي.
ګړیوم د شمالي وزیرستان مرکز میرانشاه نه نیږدې 70 کلومیټره لرې سوېل لوېدیځ د جنوبي وزیرستان شکتوی سیمې سره جوخت پوله لري او د پاکستان پوځ دغلته په کال 2014م کال کې د وسلوالو پر ضد عملیات کړي چې پکې دا سیمې پاکې ګرځول شوې وې.
د امنیتي سرچینو وینا ده د برید په نتیجه کې یې په څارنه ګومارل شوي درې پاکستان پوځیان وژل شوي. د برید په ځواب کې امنیتي ځواکونو په چټکۍ سره اغېزمنه سیمه په ګیره کې اخستې ده.
د دوی وینا ده د پلټنې پراخ عملیات اوس د پرمختګ په حال کې دي او هڅه کوي دا ناپېژندلي کسان د قانون منګولو ته راکش کړي او د علاقې امنیت خوندیتوب ډاډمن کړي.
تر دې مهاله د دې پېښې ذمه داري چا په غاړه نه ده اخستې خو په دې وروستیو کې زیاتره بریدونو ذمه وارۍ تحریک طالبان پاکستان منلې دي.
په شمالي وزیرستان کې د تېرو درو میاشتو راهسې د اتمازو قامي جرګې احتحاج دوام لري چې پکې دوی د هدفي پېښو کې د ځايي خلکو د وژلو د مخه نیولو غوښتنې ترڅنګ د علاقې د امنیت د ټینګښت غوښتنه کوي.
د احتجاجي غونډو پرمهال اتمازۍ جرګې مشران د ناامنۍ په پېښو په سیمه کې د امنیتي ځواکونو په مخ کې پرته چېلنجونه او د دوامداره څارنې اړتیا په ګوته کوي. د اوتمانزو جرګه وايي له حکومت او امنیتي ادارو هیله کیږي چې د هدفي برید په اړه هر اړخیزه څېړنه وکړي چې تر سره کوونکي یې د قانون منګولو ته وسپاري او په راتلونکي کې د دا ډول پیښو مخه ونیسي.
رپورټونه وايي په دې وروستیو کې د اتمانزو جرګې مشرانو او انتظامیې تر منځ په دې اړه دا خبرې شوې دي چې انتظامیه یې تاییدوي.
د انتظامیې د مشر مرستیال کمیشنر ظهور افریدي له دفتر جاري شوي خبر کې ویل شوي تېره اوونۍ د دوی تر منځ خبرې په مثبت ارخ روانې شوې دي.
Forum