د پاکستان د بلوچستان صوبې په ساحلي ښار ګوادر کې د روان پرلت په اړه بلوڅ يکجهتي کمېټۍ او مشرې یې ماه رنګ بلوڅ تېره شپه ناوخته ويلي، حکومتي پلاوي يې غوښتنې منلي، او د غوښتنو عملي کېدو سره به پرلت ختم کړي.
ماه رنګ بلوڅ په اېکس پخواني ټويټر د غوښتنو منلو بيان خپور کړی او ويلي یې دي، د غوښتنو منظورېدو وروسته به پرلت ختم کړي او تحريک به په منظمه ډول روان ساتي.
هغې ویلي، سبا (نن د جمعې په) سهار به د ګوادر نه د مارچ په شکل کې تربت ته ځي.
بلوڅ يکجهتي کمېټۍ ويلي، حکومتي پلاوي یې اووه غوښتنې منلې دي.
چې د "بلوچ راجي مچي (قامي غونډې) د نيول شوو او په زوره بې درکه کړل شوو کسانو خوشي کولو، د مقدمو ختمولو، د وژل شوو او ژوبلو قضيې د رياستي ادارو پرضد نه درج کېدو په صورت کې د قانوني لارې خپلولو، د تاوانونو پوره کولو، په پرامنه غونډو د طاقت نه کارولو، د کمېټۍ د غړو نه ځورولو او پرضد یې د غېر قانونه مقدمې نه درج کولو، د ګوادر او مکران ټولو لارو پرانستو او نېټ ورک بحالولو" غوښتنې شامل وې، منلې دي.
بلوڅ يکجهتي کمېټۍ ويلي، رياست ورسره په ليکلې بڼه معاهده کړې او د معاهدې په ټولو نکاتو د عمل کولو دپاره کميټي جوړه کړل شوې خو که په يوه خبره هم عمل ونه شو، نو بلوڅ يکجهتي کميټي به خپله مبارزه جاري ساتي.
ويل شوي، د غوښتنو عملي کېدو وروسته به پرلت ختموي، تربت پله به لاريون کوي او د راتلونکې تګلارې اعلان به کوي.
د بلوچستان صوبې په ساحلي ګوادر ښار کې په 28مې جولايۍ بلوڅ يکجهتي کمېټۍ (بلوڅ راجي مچي/ بلوڅ قامي غونډه) اعلان کړې او دغه غونډه بيا په پرلت بدله شوې او د حکومت څخه یې غوښتنې کړې وې.
په پينځم اګست د پاکستان د پوځ وياند لفټننټ جنرل احمد شریف چودري په يو خبري کانفرنس کې "بلوڅ يکجهتي کمېټي او تش په نوم مشرتابه یې د ترهګرو ډلو او جرايم پېشه و پراکسي" بللې وه.
هغه ويلي وو، د بلوڅ يکجهتي کمېټۍ "کار دا دی چې کومې د قانون نافذونکو ادارې د ترهګرۍ ضد، جرايم پېشه و او سمنګلرانو پرضد کارروايانې کوي د هغو پرضد پروپېګنډا وکړي او بدنام یې کړي، په بلوچستان کې پرمختيايي منصوبې لانجمنې کړي، په بهرنيو فنډونو او بيانيه خلک راجمع کوي، د رياست عملداري چېلنج کوي، بې ځايه غوښتنې کوي".
خو بلوڅ يکجهتي کمېټۍ د پوځ وياند تورونو ته په غبرګون کې ويلي وو، "پراکسي او بهرني فنډونه اخستل زمونږ نه، بلکې ستاسو (پوځ) د رواياتو برخه ده، پوځ د بلوڅ ولس د پرامنه مبارزې څخه په ويره کې دی".
بلوڅ يکجهتي کمېټۍ د پوځ لخوا تورونو په اړه ويل شوي وو، پوځ دې د غېر جانبداره درېمې پارټۍ او بشري حقونو د تنظيم د لارې د تورونو پلټنې وکړي که په دوی یې تورونه ثابت کړه دوی به د پاکستان په ګډودن د نړۍ هر عدالت ځان وړاندې کړي، خو که تورونه پرې ثابت نه کړل شو، نو د پاکستان پوځ دې د بلوڅ نسل وژنې اعتراف وکړي او ځان دې سزا ته وړاندې کړي".
Forum