امریکایي چارواکو او د مذاکراتو منځګړیو د شورو/چهارشنبې په ورځ خبر ورکړ چې حماس او اسرائیل د یوې ډزبندۍ په سر اتفاق کړی چې نتیجه به یې د حماس ډلې لخوا د ځینو یرغمالانو آزادېدل وي.
په داسې حال کې چې د امریکا سنېټ د بهرنیو اړیکو په کمېټې کې خارجه وزارت ته د منتخب صدر ډونالډ ټرمپ لخوا د نومل شوي وزیر مارکو روبیو د تصدیق اورېدنه روانه وه، سنېټر جېم رېچ چې د دغې کمېټې مشر دی، په اول ځل د حماس او اسرائیل ترمنځ د هوکړې خبر اعلان کړ.
سنېټر رېچ چې دا خبر ورکولو، نو ټینګار یې وکړ چې د احتیاط نه دې کار واخېستل شي. هغه وویل: "وړاندې له دې چې مونږ ټول خوشحالي وکړو، واضحه ده چې مونږ ټولو ته به دا کتل وي چې دا لوظنامه څنګه عملي کیږي."
په کمیټه کې د دواړو ګوندونو سنېټرانو د دې خبر هرکلی وکړ. ډېموکرېټ سنېټر کرېس مورفي، سنېټر رېچ ته په ځواب کې وویل: "رښتیا چې دا ښه خبر دی."
د اسرائیل او حماس د دې لوظنامې ترمخه، ابتدائي ګامونه دا دي چې لوظنامه به په څو مرحلو یا پړاوونو کې عملي کیږي. درې امریکایي چارواکو د اېسوشیټډ پرس خبري ادارې ته تصدیق کړی چې "ځیني" یرغملان به آزاده شي.
دا یرغملان چې آزادیږي، حماس تندلارو هغه وخت نیولي و چې د ۲۰۲۳ کال په اکټوبر میاشتې حملې کې یې د اسرائیل نه تښتولي و. همدا راز د لوظنامې ترمخه، اسرائیل به یو شمېر فلسطیني زندانیان آزادوي.
اسرائیلي عسکر به په څو مرحلو کې د غزې پټۍ نه په شا کیږي، او ځیني فلسطینیان چې د جنګ له کبله بېځایه شوي و، هغو ته به کورونو ته د ستنېدو اجازت ورکړی شي. همدا راز فلسطیني عوامو ته به زیاتې مرستې پرېښودل شي.
اسرائیل او حماس څو څو ځله د ډزبندۍ او د یرغملانو د خلاصون په سر مذاکرات کړي دي، خو هر ځل به د ځینو دلایلو له امله مذاکرات ناکامه شول. دا ځل دوی په داسې حال کې په یوې لوظنامې سلا شوي چې امریکا کې د ګل/دوشنبې په ورځ نوی صدر ډانلډ ټرمپ سوګند پورته کوي. ټرمپ ټینګار کړی و چې د هغه د راتګ نه وړاندې باید په منځني ختیځ کې ډزبندي وشي.
همدا راز صدر بایډن چې د صدارت آخرې ورځې یې دي، ویلي و چې سخت کوښښ کوي په همدې ورځوکې د اسرائیل او حماس ترمنځ خبرې کامیابه شي او یرغمال کسان آزاد شي.
Forum