اوکراین د زیارت په ورځ اعلان وکړ چې پوځ یې د روس په کورسک علاقه کې د سودژا ښارګوټي پوره کنټرول په اختیار کې راوستی، چې دا تر اوسه تر ټولو ستر ښارګوټی دی چې اوکرایني ځواکونو په روس خاوره کې د خپلو عملیاتو په ترڅ کې نیولی دی.
د اوکراین صدر ولودیمیر زېلنسکي په اېکس پلېټفارم باندې خپل سرکاري اېکاونټ کې یو بیان خپور کړی او په کې یې ویلي، د اوکراین د پوځ سرلښکر اولیکسندر سېرسکي هغه ته خبر ورکړی چې د سودژا ښارګوټی یې د روسي عسکرو له اختیاره "په کامیابۍ سره آزاده" کړې ده.
زېلنسکي په بیان کې ویلي: "هلته کې د اوکراین د پوځي کمانډ یو دفتر جوړ کړی شوی دی." د هغه وینا ده چې د روسانو څه باندې اتیا (۸۰) آبادکارۍ "آزادې" کړی شوي او تر اوسه اوکرایني ځواکونو په جارحانه عملیاتو کې په لسو ورځو کې ۱۱۵۰ کلومټره مربع سیمه نیولې کړې ده.
سودژا د اوکراین سرحد نه ۹.۶ کلومټره لېرې، د روس په خاوره کې دننه وړوکی ښار دی چې د جنګ نه وړاندې شاوخوا پنځه زره (۵۰۰۰) آبادي یې لرله. دا د روس د پايپ لائن د بنیادي اډانې ځای هم ګڼل کیږي چېرته چې له هغه ځایه یورپ ته ګېس تقسیم کیږي.
د هغه وخته چې د سودژا ښارګوټی د اوکراین په اختیار کې راغلی، تر اوسه یورپ ته د ګېسو د انتقال په برخه کې د څه خنډانو رپوټ ندی ورکړی شوی.
روس سمدستي د زېلنسکي بیان ته غبرګون ندی ښودلی، مګر د روس دفاع وزارت د زیارت ورځې په سهار وویل چې روسي ځواکونو په علاقه کې د اوکرایني عسکرو لخوا د څو نورو ځایونو د نیولو هلې ځلې شنډې کړې دي.
د صدر زېلنسکي یو لوی مشیر میخائیلو پوډولیاک د برطانیې د انډېپنډنټ اخبار سره خاصې مرکې کې ویلي چې د روس خاوره کې دننه د اوکراین جارحانه عملیات یوه "نفسیاتي" حربه ده چي د روس صدر ولاډیمیر پوټین مذاکراتو کولو او د جنګ ختمولو ته مجبوره کړي.
د امریکا د قامي سلامتیا د کونسل ترجمان جان کربي د زیارت په ورځ د خبریالانو سره د ټلیفوني خبرو د لارې وویل چې امریکا ته پته لګېدلې چې روس خپل ځیني عسکر د اوکراین دننه او شاوخوا علاقو څخه، د کورسک علاقې ته لېږلي دي. خو کربي دا ټینګار وکړ چې دا ابتدائي معلومات دي.
جان کربي دا هم وویل چې هغه په داسې کوم موقف کې ندی چې د اوکراین د پوځي عملیاتو په باب خبرې وکړي او یا دا ووایي چې د اوکراین مقصد او هدف په دې عملیاتو کې څه دی.
Forum