د اسیا اېمرجنګ کپ په فاینل لوبه کې چې نن د اتوار/یکشنبې په ورځ (د اکټوبر ۲۷مه) د عمان په مسقط ښار کې وشوه، د افغان ابدالیانو کرکټ ټیم وکړی شول چې سري لنکا ته په اوو (۷) وېکېټو ماتې ورکړي او د دې لوبو اتلولي/کپ وګټي.
په دې لوبه کې سري لنکا اول بېټنګ وکړ چې په شل آورونو کې یې د اوه وېکېټو په سوځېدو، اېله ۱۳۳ منډې وکړې. په دویم مېدان کې افغانستان ټاکل شوی ۱۳۴ هدف، د صرف درېیو وېکېټو په سوځېدو سره، په نولسم آور کې پوره کړ او لوبه یې وګټله.
په دې لوبه کې د افغانستان په بالرانو کې تر ټولو زیاتې وېکېټې، بلال سمیع او الله محمد غضنفر واخېستې، او د ټولو زیاتې منډې (۵۵) صدیق الله اتل وکړې.
تر دې وړاندې، په سیمي فاینل کې افغانستان (افغان ابدالیان لوبډلې) د هند الف ټیم ته په شل (۲۰) رنزونو کې ماتې ورکړې وه. سري لنکا په سیمي فاینل کې پاکستان ته ماتې ورکړې وه.
د اسیا اېمرجنګ کپ لوبې د کرکټ آسیایي کونسل لخوا تنظیم کیږي چې دا یې شپږم پړاو و.
تېر ځل د اسیا اېمرجنګ کپ اتلولي، پاکستان ګټلې وه.
Forum