د ملګرو ملتونو د ترهګرۍ ضد مبارزې چارواکو پرون په لسمه فرورۍ د امنيتي شورا غونډه کې خبرداری ورکړی، په افغانستان کې داعش خراسان ډله نه يواځې سيمې بلکې نړۍ ته اوس هم مهم ګواښ دی.
د ملګرو ملتونو په غونډه کې د داعش خراسان او ورسره اړونده ډلو نړۍ او سيمې ته د خطرو په اړه بحث شوی چې دغه ډلې څومره خطرناکې دي.
غونډه کې ويل شوي، داعش خراسان چې ويل کيږي مرکز یې افغانستان دی، د نړۍ خطرناکه ترهګره ډله ده، افغانستان کې یې نه يواځې په ملکيانو بلکې په طالبانو هم حملې کړي دي.
غونډې ته په تېرو شپږو مياشتو کې په نړیواله کچه د ترهګرۍ په اړه تفصيلات وړاندې کړل شوي، او ويل شوي، افغانستان کې داعش خراسان دوامداره مهمه خطره ده، پلويان یې په يورپ کې د حملو پلان جوړوي او منځني اسيايي هيوادونو کې د کسانو ګمارولو دپاره هلې ځلې کوي.
د ترهګرۍ ضد مبارزې په چارو کې د ملګرو ملتونو د جنرل سيکرټري مرستيال ولادمیر ورونکوف غونډې ته دغه تفصیلات وړاندې کړي دي.
غونډې ته امریکايي استازې دوروتي شيه ويلي، امریکا په ځانګړي توګه افغانستان او پاکستان کې د داعش د بريدونو د توان او ګمارنو په کمپېن اندېښنه لري.
د چین استازي هم ويلي، د داعش خراسان ، القاعده او ختیځ ترکستان اسلامک مومنټ سره تړلې ډلې په افغانستان کې فعاله او د یو بل سره همکاري کوي، خو په دغې اړه یې نور تفصیل نه دی ويلی.
په ملګرو ملتونو کې د پاکستان استازي منیر اکرم د امریکايي دعوې، چې داعش خراسان په پاکستان کې کسان ګماري، پوښتنه راولاړه کړې او ويلي يې دي، داعش د ګمارنو مرکز په افغانستان کې لري او پاکستان کې ګمارنې نه کوي.
هغه ویلي، پاکستان نه يواځې د داعش، بلکې د تحریک طالبان پاکستان او مجيد بريګېډ ضد مبارزه کوي.
افغانستان کې د واکمنو طالبانو لخوا د ملګرو ملتونو د امنيتي شورا غونډې ته سمدستي غبرګون مخې ته نه دی راغلی خو له دې وړاندې یې ویلي، افغانستان کې بهرنۍ ترهګرۍ ډلې شتون نه لري.
طالبان دعوه کوي افغانستان کې یې داعش له مينځه وړلی، او داعش د افغانستان څخه نه يواځې دغه هيواد بلکې بل چاته هم کوم خطر نه دی پاتې.
خو په کال 2021م کې چې طالبان په افغانستان واکمن شوي، داعش پرله پسې په افغانستان کې د بريدونو زمه وارۍ منلي دي.
د جنورۍ په 22مه د افغانستان په تخار ولایت کې یو چینایی وګړی وژل شوی وو، هغه د یو کان د کیندلو په برخه کې کار کاوه او داعش ډلې یې د وژلو ذمه واري پر غاړه اخیستې وه.
د تېر کال دسمبر په میاشت کې د طالبانو د حکومت د کډوالو او ستنېدونکو چارو وزارت سرپرست خليل الرحمان په يو ځانمرګي بريد کې وژل شوی، داعش خراسان د دغه بريد زمه واري هم منلې وه.
Forum