د چين سرکاري ميډيا ويلي صدر ژي جېنپېنګ د روس د صدر ولاډيمير پوټين سره په ټليفوني خبرو کې د روس سره په مظبوط تعلق برقرار ساتلو ټينګار کړی دی او ويلي يې دي د روس او اوکرين تر منځ شخړه د خبرو اترو د لارې د حل پلوي کوي.
د کرېملېن نه هم په خپور شوي يو بيان کې د دې پخلی شوی چې د چين صدر هم د روس د جايزو ګامونو اخستلو احساس لري چې څنګه د خپلو بنيادي حقونو او خپل امنيت ته د بهر نه ورپېښو خطرو نه دفاع وکړي.
ژي او پوټين په فيبرورۍ کې د بيجېنګ وينټر اولمپېکس په موقع د فراخه تعلق لرلو لوظنامه لاسليک کړې چې پکې دواړو خواو ژمنه کړې د دوی تعلقات به حدونه ونه لري.
ياده لوظنامه په اوکرين د روس د يرغل نه څو اوونۍ وړاندې لاسليک شوې. چين نه خو تر اوسه د روس په يرغل تنقيد کړی او نه يې لا تر اوسه دې ته روسي يرغل ويلی.
د امريکا د خارجه چارو وزارت يو وياند د چين په دريځ اعتراز وکړو او وي او ای ته يې وويل چين دعوه کوي چې بې طرفه دی خو د چلن نه يې معلومه ده چې د روس سره د نزدې تعلق ساتلو عمل يې روان دی.
وياند وويل بيجېنګ لګيا دی د روس پروپېګنډه په نړۍ کې خوروي د روس په هر نړيوال فورم کې دفاع کوي او د دې نه انکاري دی چې روس په اوکرين کې ظلم کوي بلکې وايي دا هسې جوړې شوې خبرې دي.
هغه وايي “نړۍ دا څاري چې کوم قامونه د بنيادي ازادۍ او خپلواکۍ د اصولو د پاره ودريږي او څوک د روس د وړاندې نه پلان کړل شوي او بې ځايه جنګ پټه ملګرتيا کوي”.
یادونه: د وي او ای د دې خبر دپاره څه معلومات د اېسوسي اېټېډپرېس او رویټرز خبري ادارو نه اخیستل شوي دي
