په پاکستان کې په جبري توګه د لا درکه تنانو د حقونو تنظيمونو ،د بشري حقونو فعالانو او قانون پوهانو پرېکړه کړې ده چې هغوى به په زوره د لا درکه شوو کسانو قضيې سپريم کورټ او هايکورټس ته وړي او د دې ترڅنګ به د ګردو سياسي ګوندونو سره هم وويني او يو تحریک به چلوي چې داسې په جبري توګه د خلکو د لا درکۍ د ستونزې پاېداره حل راوباسي.
په اسلام اباد کې د لا درکه تنانو د حقونو غېر دولتي تنظيم دېفنس آف هيومن راېټس د سوري لاندې شوې مشاورتي غونډه کې په زوره د لا درکه کړی شوو تنانو د کره شمېرو د راغوڼدولو سپارښتنه شوې ده او په غونډه کې ګډون کوونکو ويلي دي چې باید پاکستان دې په جبري توګه د لا درکيو په اړه د ملګرو ملتونو کنونشن لاسلیک کړي.
د غېر دولتي تنظيم دېفنس آف هيومن راېټس مشره امنه مسعود جنجوعه وايي د دې سيمينار مقصد د جبري لا درکيو د مسلې حل لټول دي.
آمنه مسعود جنجوعه وایي سياسي ګوندونه باید د جبري لا درکيو مسله په خپلو منشورونو کې شامله کړي او متاثره کورونو ته هم وايو چې هغه ګوندونو ته دې خپلې رای ورکړي څوک چې د لا درکۍ د ستونزې د هواري لوظ وکړي.
دې سيمينار کې د بشري حقونو فعالانو، خبريالانو، د سېنټ غړو او په جبري توګه د لا درکه کړی شوو تنانو خپلو خپلوانو هم ګډون کړی دی.
په پاکستان کې د لا درکه کړی شوو تنانو خپل خپلوان اکثر د لا درکۍ تورونه د هېواد د پوځ په طاقتوره خفيه ادارو پورې کوي خو پوځ دا تورونه ردوي.
د پاکستان اوسني حکومت په زوره د لا درکۍ عمل د جرم ګرځولو لپاره کال 2022 کې يو قانون هم منظور کړی خو د ياد قانون نوټيفيکېشن لا هم نه دی شوى.
د بشري حقونوفعاله طاهره عبدالله وایي چې پاکستان لا تر اوسه د ملګرو ملتونو د جبري لا درکيو په کنونشن لاسلیک نه دی او کله چې په دې لاسلیک وکړي نو بيا به مونږ د دې د مسلې د هواري جوګه شو.
پاکستان کې په جبري توګه د لا درکه تنانو د قضيو د هواري لپاره جوړ حکومتي کمېشن ترمخه په پاکستان کې نزدې 9133 کسان لا درکه دي خو د لا درکه تنانو د حقونو ډلې دا شمېرې له دې ډېرې ښاي.
سيمينار کې شريک خبريال حامد مير وايي رياست د لا درکه تنانو په اړه پروپېګنډه کوي چې ګواکې ورک شوي کسان د ترهګرو ملاتړي وو.
حامد میر وایې لکه مدثر نارو چې يو خبريال دی او هغه په دې لا درکه کړی شو چې نوموړي د کال 2018 په انتخاباتو کې د شوو درغليو په اړه په خپل فېس بک پاڼه پوسټ کړی وو ايا هغه ترهګر وو؟
پاکستان د بشري حقونو خپلواکه غېر دولتي تنظيم اېچ ار سي پى د کال 2022 په رپورټ کې ويلي چې په هېواد کې په جبري توګه د لا درکيو لړۍ دغه کال هم بې له دمې جاري پاتې شوې ده.
