چارواکي وايي اورونو دلاسه د امریکې په کېلېفورنیا ریاست کې ۱۰ کسان مړه شوې دي

د امریکې په کېلېفورنیا ریاست کې چارواکي وايي په هغه اورونو کې ۱۰ کسان وژل شوي دي چې د لاس اېنجلس ښار کې يې په پراخه کچه تباهي کړې ده.

د لاس اېنجلس کاونټۍ د صحت چارواکي د زیارت، پنجشنبې، په ورځ په اورونو کې د خلکو د مرګ ژوبلې په اړه نوي معلومات وړاندې کړل چې د مخکنیو شمېرو نه دوچنده زیاتې دي. چارواکو خبرداری کړی چې په اورونو د قابو موندل کېدو او د ويجاړې شویو ودانیو د لټون وروسته د مرګ وژبلې شمېرې زیاتېدلی هم شي.

اور وژونکو ټوله شپه اورونو د وژلو کوښښونه کول او په داسې حال کې هواګانې یو څه تم شوي وې، هېلې کاپټرو په اورونو د هوا نه اوبه هم شيندلې.

صدر جوبایډن د زیارت، پنجشنبې، په ماسپښین په وایټ هاوس کې یوې غونډې ته وویل په اورونو د قابو موندلو دپاره وفاقي حکومت کېلېفورنیا ته اضافي پېسې او وسایلو مهیا کړي دي. بایډن وویل لاس اېنجلس بدترینو اورونو ځپلی دی.

نایب صدرې کاملا هېرېس چې د کېلېفورنیا ریاست نه د سېنېټ غړې هم وه، د وایټ هاوس غونډې ته وېنا کې د لاس اېنجلس اورونه د قیامت په څېر وبلل او ويې وېل د دې اثرات به تر اینده میاشتو او کلونو پورې لیدل کېږي.

د هېرېس یو کور هم د لاس اېنجلس په هغه برخه کې دی چې اوسېدونکو ته يې د وتلو هدایات شوي دي خو دا نه ده معلومه چې ایا د هغې کور ته څه نقصان رسېدلی او که نا؟

په لاس اېنجلس کې چارواکو تر ۱۸۰۰۰۰ کسانو ته د خپلو کورونو نه د وتلو هدایات جاري کړي دي. په زرکونو کورونه به اورونو کې تیاه شوي او په لسګونو زرګونه هېکټره ځمکه سوځېدلې ده.
د لاس اېنجلس ښاروالې یا مېير کېرن باس وویل دا بې مثاله او د اور تاریخي طوفان دی.

د ځنګلاتو او د اورونو د تحفظ د کېلېوفورنیا ادارې د لاس اېنجلس په علاقه کې په پینځو مختلفو ځایونو کې اورونه لګېدلي دي چې په کې د پېليسېډز، ايټن، هرسټ، لیډیا او د سنسېټ علاقې شاملې دي. د ایټن او د پېليسېډز اورونه د ټولو نه لوی ګڼل کېږي.

چارواکو په سپږمه علاقه کې هم د زیارت، پنجشنبې، په ورځ اور د شروع کېدو خبر ورکړو چې په سیمه کې اوسېدونکو ته د انخلا هدایات جاري کړی شوي دي.

په ځینو علاقو کې غلاګانې هم شوي دي او ۲۰ کسان د لوټ مار په الزام ګرفتار کړی شوي دي.

يادونه: د دې خبر ځینې معلومات د ای پي او روېټرز خبري ادارو نه اخیستل شوي دي