د لوڅو فلمونو اداکارې ته د پېسو ورکولو په مقدمه کې عدالت ټرمپ ته نه د قېد او نه د جرمانې سزا ورکړه

د لوڅو فلمونو اداکارې ته د پېسو ورکولو د ډانلډ ټرمپ په مقدمه کې د نیویارک یو عدالت د جمعې په ورځ فېصله واوروله خو د عدالت جج ټرمپ ته نه د قېد او نه هم د جرمانې سزا ورکړه چې په نتیجه کې يې منتخب صدر د سزا د ویرې بغېر وایټ هاوس ته تللی شي.

ټرمپ به لس ورځې وروسته په سرښار واشنګټڼ کې د کانګرس د ودانۍ مخکې ته په دستوره کې د صدارت سوګند پورته کوي.

د عدالت فېصله د اورول کېدو نه مخکې ټرمپ د ویډیو دلارې عدالت ته د حاضر شو او د خپلې بې ګناهۍ دعوه يې وکړه او مقدمه يې خرابه تجربه وبلله.

ټرمپ د فلورېډا ریاست څخه د خپل یو وکیل ترڅنګ د نیویارک عدالت ته حاضري وکړه او ويې وېل بې ګناه دی او هېڅ غلط کار یې نه دی کړی.

ټرمپ په هغه لګول شوي الزامات سیاسي انتقام وبللو، ویې وېل د دې مقصد هغه بدنامول وو چې صدارتي انتخاب و نه ګټي خو د هغه په قول دا سازش کامیاب نه شو. زه په مکمله توګه بې ګناه یم، ما هېڅ څه غلط نه دي کړي.

د نیویارک د عدالت جج هوان مېرچن ۷۸ کلن ټرمپ ته د څلورو کلونو پورې د قېد سزا ورکولی شوه خو د دې په ځای هغه داسې فېصله غوره کړه چې په کې د اییني مسلو نه ډډه وشوه، د ټرمپ مقدمه ختمه شوه خو دا خبره يې یقیني کړه چې ټرمپ د امریکې په تاریخ کې وړمبی تن دی چې په سنګین الزام د سزا کېدو باوجود وایټ هاوس ته ورسېدو.

د فېصلې نه مخکې مېرچن د دې خبرې اظهار کړی و چې ممکنه ده هغه د ټرمپ په مقدمه کې بغېر د څه سزا فېصله واوروي چې د مقدمې په غېر مشروط ډول خارجېدل هم بلل کېږي.

د مېرچن د فېصلې ترمخه به ټرمپ ته نه د جېل او نه هم د څه جرمانې سزا مخامخ کېږي خو په رېکارډ به هغه په مستقل ډول مجرم وي.

د نیویارک په مقدمه کې سرکاري وکیلانو په ټرمپ الزام لګولی و چې ټرمپ د لوڅو فلمونو اداکارې سټورمي ډېنیل ته ۱۳۰۰۰۰ ډالر ورکړې وې چې هغه سره د جنسي تعلق په اړه خاموشه پاتې شي خو د کاروبار په کتابونو کې دغه پېسې خفیه ساتلو دپاره د غلط بیانۍ نه کار اخیستی و. ټرمپ دا الزام رد کړی و. د سرکاري وکیلانو دریځ و چې ټرمپ دا ګام د کال ۲۰۱۶ د صدارتي انتخاب نه مخکې اخیستی و.

یادونه: د دې خبر معلومات د ای پي او د روېټرز خبري ادارو نه اخیستل شوي دي