پيښور- دپاکستان طالبانو د تحريک نوي ټاکل شوي مشر مولوي فضل الله د طالبانو دمشرولۍ سمبالولو سمدستي وروستو حکومت سره د روغې جوړې دخبرو نه سکوټ انکار کړى اؤ وئيلي يې دي داسې بريښي چې دپاکستان موجوده حکومت قبائيلي سيمو کې د ډرون بريدونو پلوي دى ځکه ورسره خبرې نۀ شي کيدلى.
د زيارت په ماسخوتن ناوخته د پاکستاني طالبانو دتحريک وياند شاهد الله شاهد مطبوعاتو ته وئيلي دهغوئ نوى مشر په دې نظر دى چې حکومت ورسره دمذاکراتو په نوم ټگي کوي اؤ نور نه غواړي چې ددغه ټگۍ ښکار شي .
طالب وياند د مولوي فضل الله له خولې وويل"پاکستان کې چې هر گوند حکومت ته ورسيږي نو مونږ سره ډبل گيم کوي ،تردې مهاله دامن مذاکراتو په نوم مونږ تيرويستې شو خو نور به نۀ تيروځو"
شاهدالله شاهد وويل د مولوي فضل الله په نظر هغه سل په سله په دې خبره باوري دى چې موجوده حکومت د ډرون بريدونو پلوي دى ځکه نو ددې حکومت څخه د بدل اخستو دپاره هغه هره يوه پريکړه کولى شي .
دمولانا فضل الله تعلق دخيبرپښتونخوا دسوات سيمې سره دى اؤ هغه دتحريک نفاذ شريعت محمدي دمشر صوفي محمد زوم دى.
هغۀ دلوړکچ کومي ديني يا دنياوي زده کړې نه دي کړي.
نوموړى هاغه وخت خلکو وپيژندو کله چې په کال ٢٠٠٧م کې په ملاکنډ کې دشريعت دنفاذ دپاره دمولانا صوفي محمد وسله والو غږ پورته کړو.
په دغه مهال هغه دخپل غيرقانوني ايف ايم ريډيو له لارې دسوات خلکو ته دشرعي اصولو په اساس دژوند کولو تبليغات کول چې له دې امله ډيرو خلکو ورته ريډيو ملا هم وئيلو.
سوات کې دهغه د فعاليت په مهال مولوي فضل الله د ښځو په تعليم بنديزلگولى ؤ،په شلگونو اسکولونه يې په بمونو الوځولي وؤ اؤ د سوؤنو خلکو د وژنې پړه يې په غاړه اخستې وه.
په تيره موده کې پاکستاني ميډيا دائتلافي ځواکونو په يو بريد کې دهغه د وژل کيدو راپورونه هم خپارۀ کړي وؤ خو وروستو هاغه په يو ويډيو کې وليدل شو چې روغ رمټ ؤ.
کله چې په کال ٢٠٠٨م کې په سوات کې دامن دتړون څخه دسرغړونې وروستو پاکستاني پوځيانو په دغه سيمه کې دهغه دوسله والو په ضد عمليات پيل کړل نو هغه ړومبى قبائيلي سيمې اؤ بيا دافغانستان نورستان ولايت ته تښتيدلى ؤ.
راپورونه وائي دافغانستان څخه هم هغه په پاکستان کې خپل دورانکارۍ فعاليتونه دوامداره ساتلي وؤ اؤ زياتره وخت به يې په دير سيمه کې په امنيتي ځواکونو بريدونه کول.
په دغو بريدونو کې دپاکستان يو شمير پوځيانو خپل ژوند دلاسه ورکړى دى.
په تيره موده کې پاکستاني ميډيا دائتلافي ځواکونو په يو بريد کې دهغه د وژل کيدو راپورونه هم خپارۀ کړي وؤ خو وروستو هاغه په يو ويډيو کې وليدل شو چې روغ رمټ ؤ.
تيرکال په ملاله يوسفزئي سوات سيمه کې دشوي وژونکي بريد پړه هم دمولانا فضل الله وسله والو په غاړه اخستې وه.
تيره مياشت هم خپله يوه مرکه کې مولوي فضل الله ملاکنډ کې ميجر جنرل ثناء الله خان نيازي په ګډون ددريوؤ لوړپوړو پوځيانو په وژنه خوشحالي ښکاره کړې وه اؤ دغه يې خپله فتح ګرځولې وه.
دمولانا فضل الله پسر دپاکستان حکومت ٥٠ لکه روپۍ انعام هم ويستى دى اؤ څو کرته يې دافغان حکومت څخه دا غوښتنه هم کړې ده چې بايد مولانا فضل الله پاکستان ته وسپارل شي.
