د امریکا نیویارک ښار ښاروال یا مېیر بل دی بلازیو نن د اتوار په ورځ اعلان کړی چې د ښار ۱۸۰۰سکولونو به د سبا د ګل د ورځې نه تړلي وي. نوموړي دغه اعلان د اتوار په ورځ یو خبري کانفرنس ته د وینا په وخت کړی.
د نیویارک ښار سرکاري سکولونه یا مکتبونو نظام په ګرده امریکا کې تر ټولو لوې دی چرته چې ۱.۱ مېلینه یا ۱۱ لکه ماشومان زده کړې کوي.
په نیویارک کې د سکولونو د تړلو دغه اعلان په ښار کې د کرونا وایرس نه د دویم تن د مرګ د خبر نه وروسته شوی دی. د نیو یارک ایالت والي اینډریو کومو وینا ده چې د دیوم تن د مرګ پېښه د نیویارک ښار په یو اسپتال کی شوې چرته چې یوه ۸۹ کلنه ښځه د کرونا وایرس د لاسه مړه شوې. په نیویارک ایالت کې د کرونا وایرس نه ناروغه شوو خلکو شمیره ۷۲۹ته رسیدلی. په ټول ایالت کې د کرونا وایرس نه تر اوسه لګ تر لګه پنځه کسان مړه شوي دي.
ترکي د سعودي عربستان نه ستانه شوي زرګونو کسان قرنطین کړي
د اتوار یا یکشنبې په ورځ په ترکي کې چارواکو اعلان کړی چې د سعودي عربستان نه بیرته راغلي په زرګونو هغه کسان يې قرنطین کړي. دغه ټول کسان سعودي عربستان ته د عمرې او د مسلمانانو مقدسو ځایونو زیارت له تللي وو. د ترکي حکومت دغه ګام د کرونا ویرس د مخنیوي لپاره پورته کړی.
کرونا وايرس: پاکستان د دوه اوونيو دپاره سعودي عرب ته د پي ايي ای پروازونه ځنډولي
د پاکستان هوايي شرکت (پي ايي ای) ويلي د سعودي عرب د چارواکو په لارښوونه د پاکستان نه سعودي عرب ته د دوه اوونيو دپاره پروازونه ځنډول شوي دي.
د پروازونو ځنډېدل د اتوار، يکشنبې (۱۵م مارچ) څخه پېل شوي دي.
پي ايي ای ويلي د مدينې او جدې نه به تر ۱۷م مارچ پروازونه راځي چې عمر له تللي مسافر بيرته پاکستان ته راوړي.
پي ايي ای په ټولو مسافرو غږ کړی چا چې د پي ايي ای د لارې ټکټونه اخيستي د پروازونو د بندېز له امله دې د دوه اوونيو پورې هوايي اډو ته نه راځي.
پي ايي ای دغه اعلان په داسې حال کې کړی چې په پاکستان د کرونا وايرس پېښې مخ په سېوا کېدو دي او چارواکي وايي تراوسه پورې په پاکستان کې د کرونا په وايرس ۵۳ تنه اخته شوي دي.
راپورونه وايي په سعودي عرب کې هم ۱۱۸ کسان کرونا وايرس وهلي دي.
د امریکې د جان هوپکېنز پوهنتون د شمېرو ترمخه د نړۍ ۱۴۶ هېوادونو ته خور شوي کرونا وايرس تر اوسه پورې ۶۵۱۳ کسان مړه کړي او يو لاک ۶۹ زره او ۳۸۵ کسان په دې رنځ اخته شوي دي.
د کرونا وایرس د خوریدو مخنیوياندېښنو په سر اېپل کمپني په ګرد نړۍ کې خپل سټورونه یا دکانونه د دوو اونیو لپاره بندوي. دغه اعلان د اېپل کمپنۍ مشر یا سي اي او ټم کوک کړی دی.
د اېپل د اېپلیکشنو یا پروګرامونو اخستلو اېپ سټور او ان لاېن یا په انټرنېټ د سامانونو اخستل به پرانستي وي. په چین کې د اېپل کمپنۍ تړل شوي سټورونه یا دکانونه پرانستي وي.
په چین کې د کرونا وایرس وبا خوریدو وروسته اېپل شرکت په چین کې خپل ټول دکانونه او سټورونه تړلي وو. کرونا وایرس لومړی په چین کې رامخې ته شوی وو.
د اتوار د ورځې پورې په ګرده نړۍ کې د کرونا وایرس نه د ناروغه شوو کسانو شمیره ۱۵۶۰۰۰ نه سېوا شوې.د کرونا د لاسه د مړو شمیره د ۵۰۰۰ نه اوختې. په امریکا کې د اتوار یا یکشنبې د ورځې پورې ۳۶۲۱ تنه ناروغه شوي او د مړو شمیره ۶۹ ته رسیدلې.
د اېپل کمپنۍ مشر په ټوېتر په خپل بیان کې ویلي شرکت یې په ګرده نړۍ کې خور شوي کرونا وایرس د ناروغانو د علاج لپاره ۱۵ میلینه ډالره ورکوي.
د اېپل موباېل او کمپیوټرو جوړولو شرکت په ګرده نړۍ کې د ۵۰۰ پورې سټورونه یا دکانونه لري. په دغو کې نیمايي په امریکا کې دي.
