په پښتونخوا صوبه کې د ترهګرۍ له وروستیو لویو پیښو وروسته د هیواد د دفاع وزیر خواجه آصف ویلي دي چې حکومت په دې صوبه کې د ترهګرو پر ضد تراوسه د پوځي عملیاتو پیل کولو اراده نه لري.
د دفاع وزیر وایي خېبر پښتونخوا صوبه کې د ترهګرۍ پېښې سیوا شوي اؤ صوبایي حکومت یې د مخنیوي لپاره هیڅ اقدام نه کوي چې ددې مطلب ترهګرو سره مرسته کول دي.
څېړونکي وایي چې د ترهګرۍ په روان بهیر د قابو موندلو نه زیات د خیبر پښتونخوا حکومت د خپل ګوند د سیاسي ګټو لپاره هڅې کوي او دې حکومت کې هغه خلک هم شامل دي چې د مذاکراتو په نامه یې ترهګر بیرته دلته اباد کړې وو.
د وایس آف امریکه سره په خبرو کې د دفاع وزیر خواجه آصف ویلي دي چې د خیبر پښتونخوا حکومت نه خو د ترهګرو پر ضد څه اقدام کوي او نه د ترهګرۍ ددې پیښو غندنه کوي.
هغه وایي "اوس چې پاراچنار کې د ترهګرۍ یوه لویه پیښه شوې ده، نو موږ غواړو چې صوبایي حکومت د دې ډول پیښو مخنیوي لپاره عملي کار وکړي، پوځ او نورې ادارې به د صوبايي حکومت مکمله مرسته کوي"
په دې اړه خبریال محمود جان بابر وایي چې د خیبر پښتونخوا بیلابیلو سیمو کې د ترهګرۍ لویې پیښې شوې، خو داسې کم لیدل شوي دي چې د صوبې اعلا وزیر د دې پیښو وروسته د هغو سیمو خلکو ته ډاډګیرنې لپاره تللي وي. نو دې نه ښکاري چې د صوبايي حکومت ترجیحات څه دي؟
محمود جان بابر دا خبره هم کوي چې خیبر پښتونخوا حکومت کې اوس داسې خلک هم شامل دي چې دوی په تېرو حکومتونو کې د مذاکراتو په نامه دغه ترهګر بیرته دلته آباد کړې وو.
د هغه په خبره "باید چې اوس صوبایي حکومت یو ځل بیا دا خلک د ترهګرۍ پر ضد د خبرو لپاره وکاروي، خو اوس صوبایي حکومت د سیمې امن نه زیات توجه سیاسي ګټو ته ورکوي"
تېره اونۍ د ترهګرۍ پر ضد د قومي تګلارې یا نیشنل ایکشن پلان د ایپکس کمیټې په غونډه کې د پوځ سرلښکر جنرال عاصم منیر هم ویلي وو چې خیبر پښتونخوا او بلوچستان کې د حکومتي ستونزو له وجې امنيتي ځواکونه په نښه کېږي.
د څېړنیزې ادارې "پکس" څېړونکی عبدالله خان ډیوه ته وایي چې پوځ سره یواځې د عملیاتو اختیار دی.
هغه زیاتوي چې "د پوځ بنیادي ذمه واري یوه سیمه د ترهګرو نه پاکول دي، او بیا د دې انتظام به صوبایي حکومت په لاس کې اخلي، د فاټا انضمام خو شو خو انتظامي معاملات اوس هم سرته نه دي رسېدلي. دغه حال د بلوچستان صوبه هم دی او دا داسې مسلې دي چې پوځ یې نه شي حل کولای، دا کار د حکومتونو دی"
په خیبر پښتونخوا صوبه کې واکمن ګوند پاکستان تحریک انصاف د خپل ګوند د مشر عمران خان له بنده د خوشې کولو لپاره نن د نومبر څلېریشتمې نیټې څخه یو لوی احتجاج اعلان کړی دی.
تحریک انصاف دا احتجاج په داسې حال کې کوي چې مخې ته راغلي معلومات ښیي چې کورمه کې د زیارت د ورځې نه د شیعه ګانو اؤ سنیانو تر منځ پېل شوؤ نښتو کې تر اوسه له ۷۰ زیات کسان وژل شوي اؤ ګڼ شمیر نور ژوبل شوي دي.
فرانس پرس خبري اژانس وایي د ډیورنډ کرښې ته څیرمه د خیبر پښتونخوا په غرنيو سیمو کې په وروستیو څو میاشتو کې د سني او شیعه مسلمانانو ترمنځ په پرله پسې نښتو کې شاوخوا ۱۵۰ کسان وژل شوي دي.
Forum