وزیر اعلا ګنډا پور اسلام اباد کې نیول شوو د پښتونخوا سرکاري ملازمانو ته د ترقۍ ورکولو اعلان کړی

په اسلام اباد کې د تحریک انصاف د احتجاج په مهال نیول شوي د پښتونخوا صوبې سرکاري ملازمین له زندانه خوشې کړل شوي اؤ خپلې صوبې ته رسیدلي دي.

پېښور ته په رسېدو د خېبر پښتونخوا وزیراعلا علي امین ګنډا پور له زندانه په خوشې شوؤ سرکاري ملازمانو ګل پاشي کړې، په نوکریو کې یې ورله د ترقۍ اؤ یوې میاشتې د رخصتي ورکولو اعلان یې کړی دی.

د پاکستان سینیټ کې د وزیراعلا دې اعلان ته حکومتي سینیټر طلال چوهدري سخت غبرګون ښودل اؤ د وفاقي حکومت نه یې غوښتنه کړې ده چې د وزیراعلا ګنډا پور د دې اقدام په سخته نوټس واخلي چې څنګه یې د یوې صوبې لخوا په پلازمینه یرغل کوونکو ته اعزازات ورکړي دي.

څېړونکي وایي د صوبې سرکاري ملازمین د ګوم سیاسي ګوند فعالان نه بلکې د ریاست ملازمان دي اؤ هغوي د قانون اؤ ایین له مخې په سیاست کې ګوتې نه شي وهلی ځکه نو کومو سرکاري ملازمانو چې د تحریک انصاف جلسه کې ګډون کړی یا یې د صوبې وسایل کارولي هغوي ته باید د ویاړونو پځای سزا ورکړل شي.

د اسلام اباد ډي چوک کې د تحریک انصاف د احتجاج په مهال نیول شوي د خېبر پښتونخوا صوبې 86 سرکاري ملازمان اؤ دوه د صوبایي اسمبلۍ غړي تېره ورځ د اټک له زندانه خوشې کړل شوي وؤ.

دغه سرکاري ملازمان د جمعې په ورځ په پېښور کې د وزیراعلا ماڼۍ ته غوښتل شوي وؤ ، هلته یې وزیراعلا تود هرکلی کړی اؤ ګلونه یې پرې شیندلي دي.

په دغه موقعه د صوبې وزیراعلا علي امین ګنډا پور اعلان کړی چې راخلاص شوؤ ملازمانو ته به پخپلو محکمو کې یو ګریډ ترقي ورکول کیږي اؤ ددې تر څنګ یې هغوي لپاره د یوې میاشتې د رخصتۍ ورکولو اعلان هم کړی دی.

د پښتونخوا د بېړنیو مرستو د ادارې ریسکیو 1122 سرچینو ویلي چې دهغوي شپږ ملازمان اوس هم په اسلام اباد کې بندیوان دي .

په مرکز کې د واکمن ګوند پاکستان مسلم لیګ (ن) سینیټر ښاغلي طلال چوهدري د وزیراعلا علي امین ګنډا پور په فیصله سختې نیوکې کړې دي.

پخپله وینا کې ښاغلي چوهدري وویل په تېرو ورځو کې په اسلام اباد یو یرغل شوی ؤ چې په دغه موقعه څه کسان نیول شوي وؤ اؤ دغه یرغل کوونکي د یوې صوبې سرکاري ملازمان وؤ.

سینیټر طلال چوهدري وویل د پښتونخوا وزیراعلا دغه سرکاري ملازمان خپلې ماڼۍ ته بللي ، هغوي ته یې هارونه ورپغاړه کړي اؤ د یو ګریډ ترقۍ ورکولو اعلان یې کړی دی.

هغه غوښتنه وکړه چې وفاقي حکومت باید ددې خبرې په سنجیدګۍ سره نوټس واخلي په پښتونخوا کې موجود د وفاق استازی (ګورنر) باید ددې ترقیو په اړه خپل کردار ادا کړي.

په ډي چوک اسلام اباد کې چې د تحریک انصاف د احتجاج په مهال کوم سرکاري ملازمان نیول شوي وؤ هغوي کې 46 د ریسکیو 1122، 25د پولیس اؤ 13 د بلدیې ملازمین شامل وؤ.

د احتجاج په مهال د پښتونخوا نه دغو ملازمانو ځان سره د درنه سرکاري مشینري هم اسلام اباد ته بوتللې وه چې هغه هم ترې د اسلام اباد پولیسو خپله ولکه کې اخستې ده اؤ تر اوسه د اور وژنې ګڼ شمیر ګاډي، کرینونه اؤ نوره درنه مشنیري په اسلام اباد کې په سرکاري تحویل کې ده.

د پاکستان د یو شخصي ټي وي سیمه ییز مشر اؤ د خېبر یونین اف جرنلسټس پخوانی صدر ښاغلی فدا خټک وایي د پاکستان په ایین اؤ قانون کې سرکاري ملازمانو ته سیاست کې د لاس وهلو اجازه نه شته ځکه چې دا ملازمان د ریاست نوکران وي او دوي نه شي کولی چې د یو ګوند د فعالانو په توګه کردار ترسره کړي.

ډيوه سره خبرو کې ښاغلي فدا خټک وایي اسلام اباد ته د احتجاج لپاره د صوبې د سرکاري مشینرۍ په وړلو دوي د ریاست اؤ خپلې صوبې سره خیانت کړی دی اؤ باید ددې جرم په بدل کې دوي ته سزا ورکړل شي.

هغه وایي دې سرکاري ملازمانو ځان سره د پېښور اؤ د صوبې د نورو برخو د اور وژنې ګڼ ګاډي اسلام اباد ته د ځان سره بوتللي وؤ هغه ترې هغه پولیسو نیولي اؤ ودرولي دي اؤ د هغې نتیجه دا شوه چې تېرو ورځو کې په بېښور کې په یوه کارخانه اور ولګېدو نو بیا د ریسکیو 1122 سره د اور وژلو لپاره ګاډي نه وؤ اؤ څلېریشتو ساعتو کې په هغه فیکټرۍ لګیدلی اور مړ نه کړی شو.

د فدا خټک په خبره د جیل نه راخلاص شوي دا ملازمان په صوبه کې بېرته جیل ته اچول پکار وؤ خو له بده مرغه حکومت هغوي په اعزازاتو ونازول.