د حزب الله نوی مشر وايي د اسرایل خلاف جنګ به جاري ساتي
واشنګټن (وي او ای/ای پي/ای اېف پي/روېټرز) ـ د حزب الله نوي مشر نعیم قاسم د شورو، چهارشنبې، په ورځ وویل په لبنان او د اسرایل په شمال کې به تر هغه وخت پورې جنګ دوامداره ساتي ترڅو چې اسرایل د ډز بندۍ داسې تجویز نه وي وړاندې کړی چې ډلې دپاره د قبلولو وړ وي.
قاسم وویل که اسرایل "جارحیت" ودرولو او د حزب الله د شرطونو سره يې سمون خوړلو نو ډله به يې ډز بندي ومني. د هغه رېکارډ شوی پېغام د نامعلومه ځای نه په ټېلې وېژن نشر شو.
هغه وویل د ډزبندۍ غوښتنه نه کوي او د نامعلومه مودې پورې به جنګ ته دوام ورکوي.
قاسم یوه ورځ مخکې د حزب الله نوی مشر وټاکل شو چې د حسن نصرالله ځای ونېسي. نصرالله د ډېر وخت راهسې د حزب الله مشر و او د لبنان سرښار بېروت په مضافاتو کې تېره میاشت د اسرایل په هوايي حمله کې ووژل شو.
د اسرایل د توانای وزیر اېلي کوهن وویل د حکومت د جنګ کابینې حزب الله سره د ډزبندۍ په شرایطو خبرې اترې شروع کړي دي. هغه یو اسرایلي رېډیو ته وویل په دې خبرو اترو کې به وخت لګي.
اسرایل د لبنان په مشرقي علاقه کې خلکو ته سیمې نه د وتلو امر کړی
واشنګټن (وي او ای/ای پي/ای اېف پی/روېټرز) ـ اسرایلي پوځ د شورو، چهارشنبې، په ورځ د لبنان د مشرقي علاقې بقاع وادۍ په ځینو برخو کې مقامي اوسېدونکو ته سیمې نه د وتلو امر وکړو او د حزب الله خلاف د پوځي اقداماتو خبرداری يې وکړو.
د اسرایل د ډیفېنس فورسز ترجمان (نې) وویل د دورس، بعلباک او د عین بورضای سیمو اوسېدونکي دې د خپلو کورونه پرېږدي.
د مقامي خلکو ته د خپلو سیمو نه د انخلا د اسرایل د احکاماتو وروسته اسرایلي ځواکونه په دغو سیمو کې اکثر هوايي بمباري کوي چې د اسرایلي چارواکو په قول هدف یې د حزب الله وسله وال د اسرایل د سرحد نه په تمبول دي.
اسرایل دغه طریقه په غزه کې هم استعمال کړې چې ملګرو ملتونه او د امدادي ادارو چارواکي پې نیوکې کوي او وايي ملکي کسان اکثر د انخلا دپاره تیار نه وي او د تګ دپاره محفوظ ځای هم نه لري.
صدر بایډن: په غزه کې جنګ پکار ده چې ختم شي
واشنګټن (ای اېف پي) ـ د امریکې صدر جوبایډن د ګل، دوشنبې، په ورځ وویل پکار ده چې په غزه کې ختم شي او هغه د ډز بندۍ دپاره کوښښونه بیا تازه کوي.
بایډن وویل "مونږ ډزبندۍ ته ضرورت لروو. پکار ده چې مونږ دا جنګ ختم کړوو. دا ختمېدل پکار دي، دا ختمېدل پکار دي، دا ختمېدل پکار دي."
په ډېلاوېیر ریاست کې د امریکې په صدارتي انتخاب کې وختي ووټ ورکولو وروسته بایډن خبریالانو سره خبرو اترو کې وویل هغه به د سولې دپاره په سمدستي ډول کار وکړي.
د ملګرو ملتونو سېکیورټي کاونسل به په ایران د اسرایل د حملې په موضوع غور کوي
واشنګټن (وي او ای/ای پي/ای اېف پي/روېټرز) ـ د ملګرو ملتونو سېکیورټي کاونسل به د ګل، دوشنبې، په بېړنۍ غونډه کې په ایران د اسرایل د حملو وروسته د منځني ختیځ په صورتحال غور کوي.
سوېټزرلېنډ چې د سیکورټي کاونسل صدارت کوي، وویل د غونډې غوښتنه ایران کړې او الجزایر، چین او يې روس ملاتړ کړی دی.
د ایران خارجه وزیر عباس عراقچي د خالي، شنبې، په ورځ په ۱۵ غړو مشتمل سېکیورټي کاونسل ته خط کې وویل د" اسرایلي رژیم" ګامونه نړیوال امن ته خطر دی او په یوه نازکه سیمه کې نوره بې ثباتي پېدا کوي.
د خالي، شنبې، په ورځ په ایران د اسرایل په حملو کې اسرایلي جنګي جهازونو د ایران د مزایلو کارخانې په هدف کړې. د اسرایل د حملې نه څو هفتې مخکې ایران په قریباً ۲۰۰ بېلېسټېک مزایلو په اسرایل حمله کړې وه.