اسرایلي وزیراعظم د دفاع وزیر لرې کړو
واشنګټن (ای پي) ـ د اسرایل وزیراعظم بېنجمن نېټن یاهو په غېر متوقعو اعلان کې د هېواد د دفاع وزیر یواو ګېلانټ د دندې څخه لرې کړو.
په غزه کې د حماس خلاف د اسرایل جنګ د شروع کېدو راهسې نېټن یاهو او ګېلانټ اختلافات لرل خو اسرایلي وزیراعظم تر اوسه ګېلانټ د برطرف کولو نه ډډه کړې وه.
تېر کال د مارچ په میاشت کې نېټن یاهو کوښښ کړی و چې ګېلانټ لرې کړي خو د دې ضد په لارو کوڅو کې احتجاجونه راوپارېدل.
نېټن یاهو د ګېلانټ د لرې کولو اعلان د نهې، سه شنبې، په شپه ناوخته وکړو.
فلسطیني خبري اداره وايي په غزه کې تېره شپه اسرایلي بمبارۍ ۴۷ کسان وژلي
واشنګټن (روېټرز) ـ فلسطیني خبري ادارې وفا د جمعې په ورځ په يو رپورټ کې وویل په مرکزي غزه کې تېره شپه د اسرایل په بمبارۍ کې ۴۷ کسان وژل شوي دي، چې زیاتره ښځې او ماشومان دي.
وفا وویل دا حملې د غزه په ډیر البلاح، النصیرت کېمپ او په الزوایده کلي کې شوي دي.
اسرایلي پوځ وویل عسکرو يې په مرکزي غزه کې یو شمېر مسلح ترهګر ختم کړل او د شمالي غزه په جبلیه سیمه کې يې په لسګونو ترهګر ووژل.
په منځني ختیځ کې په مختلفو محاذونو جګړې دوام لرلو، لږ تر لږه ۱۶ کسان په کې ووژل شوو
واشنګټن (وي او ای/ای پي/ای اېف پي/روېټرز) ـ په منځني ختیځ کې د زیارت، پنجشنبې، په ورځ په ومختلفو محاذونو جګړې دوام لرلو او لږ تر لږه ۱۶ کسان په کې ووژل شوو.
پينځه کسان د اسرایل په شمال کې د لبنان څخه په ويشتلو شویو وسله کې ووژل شوو. د چارواکو په وېنا په اسرایل کې په وژل شویو کسانو څلور غېر ملکي امدادي کارکوونکي او یواسرایلي کروندګر شامل دي. په لبنان کې چارواکو وویل د اسرایل په بمبارۍ کې لږ تر لږه اته کسان ووژل شوو چې د صحت شپږ کارکوونکي هم په کې شامل دي.
د دې نه مخکې په رپورټونو کې وېل شوي وو چې په مقبوضه وېسټ بېنک د اسرایلي چاپې په مهال لږ تر لږه درکسان وژل شوي وو.
اسرایلي پوځ وویل په شام کې د حزب الله د وسلې په ګودامونو او په مرکزونو يې حملې وکړې. اسرایلي پوځ وویل حزب الله د لبنان د سرحد سره نږدې په شام کې وسلې ذخیره کوي او بیا يې لبنان ته سمګل کوي.
فلسطیني چارواکي وايي په وېسټ بېنک کې د اسرایلي ځواکونو په چاپه کې درې کسان وژل شوي دي
واشنګټن (وي او ای/ای پي/ای اېف پي/روېټرز) ـ فلسطيني چارواکو ویلي په مقبوضه وېسټ بېنک کې د زیارت، پنجشنبې، په ورځ د اسرایلي ځواکونو د چاپې په مهال درې کسان وژل شوي دي.
په عملیاتو کې د کډوالو د نور شمس کېمپ په سیمه کې هوايي حملې هم وشوې.
اسرایلي پوځ وویل د ترهګرو بنیادي اډاڼه يې په هدف کوله او د حماس هغه وسله وال يې ووژلو چې د حملو په منصوبه سازۍ کې ککړ و.
د صحت د فلسطيني وزارت ترمخه، تېر کال د اکتوبر په اوومه نېټه په اسرایل د حماس د حملې وروسته اسرایلي ځواکونو په وېسټ بېنک کې ۷۶۳ فلسطینیان وژلي دي.