پاکستان وایي د ریل ګاډي د یرغمل شوو مسافرو د خلاصي عملیات روان دي

د پاکستان حکومتي میديا، ټي وي او ريډیو، وایي امنیتي ځواکونو د ناارمه بلوچستان بولان سیمه کې د وسله والو تر برید لاندې ریل ګاډي او د ناستو مسافرو د خلاصي لپاره عملیات پیل کړي دي.

د بلوچستان صوبې څخه د خېبر پښتونخوا پیښور ته تلونکي مسافر ریل ګاډي باندې د وسله وال بريد پړه ناقانونه ګرځول شوې بلوڅ بېلتون خوښې ډلې، بي ایل اې، منلې. یادې ډلې میډیا سره په شریک شوي یوه بیان د یرغمل شوو مسافرو په بدل کې د بلوڅ قیدیانو د خوشې کیدو غوښتنه کړې او دعوه کوي چې 245 مسافر د پاکستان پوځیان دي.

د بي ایل اې دعوې او د پیښې په ځاې کې د امنیتي ځواکونو د عملیاتو په اړه وي او اې ډیوه ته کوم بې طرفه سرچینو د دغه دعوو پخلی نه دې کړی.

تراوسه دا هم کره شوې نه ده چې د تیرو څو ساعتونو راهیسې دې پیښه کې څومره کسانو ته مرګ ژوبله اوښتې ده. د بلوچستان صوبایي حکومت ویاند شاهد رند، البته، ویلي چې ریل ګاډي کې دننه ډزې شوې دي.

د بلوچستان صوبې په مرکزي ښار کوټه کې د ريل ګاډو محکمې یوه اعلا چارواکي محمد کاشف اې اېف پي خبري ادارې ته ویلي: "په ګاډي کې له 450 څخه زیات مسافر د وسله والو کسانو یرغمل نیولي دي."

ښاغلي کاشف ویلي : "په مسافرو کې ښځې او ماشومان هم شامل دي. "

اې ایف پي خبري ادارې ته امنیتي چارواکو ویلي: " امینتي ځواکونو په کامیابي سره د ترهګرو نه 80 یرغمل خوشي کړي. په دغو کې 43 سړي، 26 ښځې، او 11 ماشومان شامل دي." دغه چارواکو ویلي چې 13 وسله وال هم وژل شوي دي.

د بلوچستان صوبې وزیراعلا سرفراز بګټي په ایکس یوه بیان کې ویلي چې د اخري ترهګر د وژلو پورې به اپریشن روان وي.

چاراکي وایي پر ریل ګادی د بولان په غرييزه سیمه ډهاډر کې وسله وال برید شوی چې د ټرېن یا ریل ګاډي د چلونکي او ځینو مسافرو د ټپي کېدو خبر هم ورکړل شوی دی. دغه ټرین د کوټې نه پیښور ته روان وو، او جعفر ایکسپریس نومیږي.

ښاغلی رند ويلي په سبي روغتون کې بيړني حالت په ځای کړل شوي او سيمې ته اېمبولنسونه او امنیتي ځواکونه روان کړل شوي دي.

پر ټولنیزو رسنیو خپاره کړ‎ي بیان کې بي ایل اې ویلي که د حکومت له خوا پر دوی ځوابي عملیات کېږ‎ي نو دوی به مسافر ووژنې چې زمه وار به یې پوځ وي.

د رېل ګاډي د چاراکو په وینا، یاد مسافر ګاډی د پنجاب راولینډی پر لارہ تیریږ‎ي او بیا پېښور ته ځي. دوی زیاتوي "جعفر اېکسپریس اته بوګۍ یا ډبې لري چې په یوه بوګۍ کې یې د 80 پورې مسافر سواره دي".

بلوچستان لېبرېشن ارمي، بي اېل ای، په بلوچستان کې د وسله والو لویه ډله ده چې امريکې او پاکستان په ۲۰۰۶ کې ترهګر تنظیم ټاکلی دی. بي اېل ای د پاکستان د حکومت مخالفت کوي او د پاکستان، افغانستان او د ایران په ځینو سیمو مشتمل یو خود مختاره ریاست جوړول غواړي.

بي اېل ای اکثره په بلوچستان کې په امنیتي ځواکونو، چینایي وګړو او پانګو او کله کله د پاکستان په لوی اقتصادي ښار کراچۍ کې هم د حملو پړه مني.

د کال ۲۰۲۲ د نومبر په میاشت کې چې تحریک طالبان پاکستان، ټي ټي پي، د حکومت سره ډز بندي ختمه کړه او وسله والو ته يې حملې د بیا شورو کولو امر وکړو نو بي اېل ای هم زړه وره شوه. په اسلام اباد کې مېشت څېړونکی عبدالله خان وايي بي اېل ای په بلوچستان کې د نورو ډلو په ملاتړ فعالیت کوي.

د تېر کال د دسمبر په میاشت کې د بلوچ نېشنل ارمي نومې ډلې یو مشر سرفراز بنګلزی تر د ۷۰ پورې نورو همکارانو ترڅنګ حکومت ته تسلیم شو. هغه د پېسو دپاره د ملکي کسانو په تښتولو او د غېر مسلح کسانو په وژنه کې په خپل کردار د پښېمانۍ اظهار کړی وو.

د فرورۍ په میاشت کې بلوڅ وسله والو په قلات کې اووه پنجابیان هم وژلي وو.

د پاکستان د ټولې رقبې د نیمې نه زیاته سیمه، بلوچستان او خېبر پښتنونخوا، کې د څو کلونو راهیسې د بلوڅ بیلتون غوښتونکو او مذهبي تندلارو ډلو د ریاست پرضد روانه جګړه تنده کړې ده. په اسلام اباد کې د څېړنې ادارې پېکس د شمیرو ترمخه یواځې تیره یوه میاشت کې په یادو دوو صوبو کې 79 بریدونه شوي وو. په دغو کې 32 په بلوچستان کې شوي وو.

يادونه: په دې خبر کې ځینې معلومات د اې ایف پي او اي پي نه اخیستل شوي