د افغان حکومت چارواکو او د پارلمان غړو د روسيې د هغو وروستیو څرګندونو غندلو ته دوام ورکړی چې وايې له طالبانو سره يې محدودې سیاسي اړیکې ساتلي.
د افغانستان د پارلمان په غونډه کې پدې اړه تاوده بحثونه وشول او ځینو وکیلانو له طالبانو سره د روسيې اړیکې له شرمه ډکې وګڼلې.
یوشمیر نورو بیا له طالبانو سره د پرمختللو وسلو او جنګي اسانتیاوو په برخه کې د روسیې مرستې په کلکو ټکو وغندلې.
وکیلانو همدارنګه له طالبانو سره د مرستې په برخه کې په ایران باندې هم توندې نیوکې وکړې.
د افغانستان ولسې جرګې نن د چهارشنبې په ورځ داسې یوه مسوده تصویب کړه چې پکې د ولسمشر اشرف غني د ملي یوالي له حکومت څخه غوښتل شویدي چې ګاونډيان او د سیمې هیوادونه پرې نږدي د افغانستان په کورنیو مسلو کې لاس وهنه وکړي.
د افغانستان د ملي شورا دغه توند غبرګون وروسته له هاغې څرګند شو چې تیره اونۍ په کابل کې د روسیې سفیر الیکزاندر منتیتسکي له هاغو خبرو پرده پورته کړه چې حکومت یې له طالبانو سره اړیکي لري خو دا اړیکې ډیرې جدي نه دي.
د روسيې سفیر د افغانستان په سنا کې د نړیوالو اړیکو کمیټې ته د شنبې یا خالي په ورځ وویل چې له طالبانو سره دومره اړیکي لري چې د روسيې امنیت پرې خوندي وي.
ده وړاندې وویل په ورته وخت کې دوي طالبان د سولې خبرو اترو لپاره هم هڅوي.
د روسيې سفیر له طالبانو سره د روسيې د اړیکو پر سر د افغان حکومت پر اندېښنو خواشینې څرګنده کړه او زیاته يې کړه چې د امریکا متحده ایالات، برتانیه، ایټآلیا، قطر او سعودي عربستان ټول له طالبانو سره سره اړیکې لري.
خو دغه روسي ډپلوماټ هغه تورونه رد کړل چې ګواکې هیواد یې د داعش د ځپلو په برخه کې له طالبانو سره مرستې کوي ترڅو د منځني ختیځ له لیارې يې ګواښ روسيې ته راکم شي.
خو ده وړاندې وویل چې طالبان او روسان په افغانستان کې د داعش د ځپلو په برخه کې یوخیل ګټې لري.
د افغانستان لپاره د روسيې سفیر یوځل بیا د روسیې هغو انديښنو ته هم اشاره وکړه چې په سوریه او عراق کې د داعش په لیکو کې ډیري جنګیالي د منځني ختیځ د هیوادونو دي نو له همدې امله په یادو هیوادونو کې د هغوي له ماتیدو سره ښايې زیاتره يې بیرته اصلي هیوادونو ته راشي او روسیې ته امنیتي ستونزې وزیږوي.
