د امریکې خارجه وزیر د سویلي افریقې د سفیر له هیواده د شړلو اعلان کړی

د امریکا د بهرنیو چارو وزیر مارکو روبیو ویلي، د سویلي افریقې سفیر "پرسونا نان ګرېټا" (ناخوښه شخصیت) ګرځول شوی دی.

نوموړي په ټولنیزه رسنۍ ایکس خپل یو خپور کړي بیان کې ویلي"په امریکا کې د سویلي افریقې سفیر ابراهیم رسول ته به اوس زموږ په ستر هېواد کې هرکلی و نه شي."

د هغه په وینا، ابراهیم رسول یو "ریس بېټینګ" (د نسل پر بنیاد خلک وېشونکی) سیاستوال دی چې د صدر ټرمپ او امریکا سره دښمني لري.

مارکو روبیو زیاته کړې، "موږ د سویلي افریقا له سفیر سره هیڅ خبرې نه لرو، نو ځکه یې ناخوښه شخصیت بولو".

په واشنګټن کې د سویلي افریقې سفارت لا تر اوسه د دې اعلان په اړه څه نه دي ویلي.

د امریکا د بهرنیو چارو وزیر دا بیان په داسې وخت کې ورکړی چې د امریکا او سویلي افریقې اړیکې له کړکېچ سره مخ دي.

صدر ټرمپ تازه د یوه اجرائیوي حکم له مخې، د سویلي افریقې مرسته ځنډولې، چې لامل یې لانجمن د "ځمکو د اصلاحاتو قانون" ښودل شوی.

ټرمپ ویلي، دا قانون به د دې سبب شي چې په سویلي افریقا کې د سپین پوستو ملکیت لرونکي زراعتي فارمونه ضبط شي. هغه دا هم ویلي، چې د سویلي افریقې بزګرانو ته به امریکا ته د کډوالۍ هرکلی ووايي.

د سویلي افریقې صدر، سیرل رامافوسا، څو ورځې وړاندې د دې اقداماتو دفاع کړې وه.

نوموړي ویلي، "موږ د اساسي قانون له اصولو لارښوونه اخلو، چې پر دولت دا ذمه واري ږدي، څو د پخواني نژادي توپیر اثرات له منځه یوسي."