د امریکا د بهرنیو چارو وزیر مارکو روبیو د شورو په ورځ یو بیان جاري کړو چې پکې یې په هغو بهرنیو مقاماتو د ویزې نوي بندیزونه اعلان کړي چې امریکا ته د غیر قانوني کډوالۍ اسانتیا برابروي.
روبیو پخپل بیان کې وویل: "زه نن د ویزې د بندیزونو یوه نوې تګلاره اعلانوم، چې د کډوالۍ او ګمرکاتو چارواکي، د هوایی ډګرونو او بندرونو مسؤلین او نور داسې کسان پکې شامل دي، چې ګومان کېږي امریکا ته د غیر قانوني کډوالۍ موقع برابروي".
د غیر قانوني کډوالۍ مخنیوی د امریکا د صدر ډونلډ ټرمپ د مهمو ترجیحاتو نه یو دی. ټرمپ د خپلې دوهمې دورې د واک په اوله ورځ د امریکا په جنوبي پولو باندې بیړنی حالت نافذ کړو او د امریکا – مکسیکو پولې ته یې د ناقانونه کډوالو د راتګ د مخنیوي لپاره اضافي وسایل وکارول.
روبیو زیاته کړه چې د امریکا سرحدونه خوندي ساتل د "یو محفوظ، باثباته او خوشحاله امریکې" د جوړولو لپاره ضروري دي.
هغه دا هم وویل، "هغه ملکونه چې د کډوالۍ په لارو کې پراتۀ دي، لازمي ده چې غیر قانوني کډوالو ته د موقعو برابرولو په ځای، د دوی مخه ونیسي او خپل رول ادا کړي."
په دې بیان کې د کوم خاص ملک نوم نه دی اخستل شوی، خو دا ویل شوي چې د ویزې دا نوې بندیزونه به په هغو کسانو هم هم لګي چې په شعوري توګه د هغو کډوالو تګ راتګ اسانه کوي، کوم چې د امریکا د سویل لویدیزې پولې نه په غیر قانوني توګه د داخلېدو کوښښ کوي، یا بیا د مهاجرت د قوانینو، تګلارو او مقرراتو په عملي کولو کې پاتې راغلي.
باید وویل شي چې میکسیکو یوازینی ملک دی چې د امریکا د سویل لویدیز سره ګډه پوله لري.
د امریکېد بهرنیو چارو وزیر ویلي دي چې نوې پالیسي موجودې پالیسۍ بشپړوي چې په ۲۰۲۴ کې نافذ شوي ترڅو د خصوصي سکتور چلونکي په نښه کړي کوم چې هغه مهاجرینو ته چې په غیر قانوني توګه امریکې ته د ننوتلو په لټه کې دي ترانسپورت او سفر چمتو کوي.
د امریکا د بهرنیو چارو وزارت اعلان وکړو چې دا عملیات به تر هغه جاري وي، ترڅو چارواکي د غیر قانوني کډوالۍ د مخنیوي لپاره خپل موجوده قوانین او پالیسۍ پوره نافذ کړي.
په بیان کې راغلي: "کله چې د ملي امنیت دفاع خبره وي، نو امریکا به یو قدم هم شاته نه اخلي".
Forum