د فلورېنس په نامه سمندري طوفان د امریکا شمالي کېرولاینا ایالت ته ورسېده.
ددغه طوفان ځواک که څه هم کم شوی خو بیا هم وژونکی دی.
چارواکو د جمعې په سهار وویل، ددغه طوفان سیلۍ په یو ساعت کې دا مهال ۱۰۹ کیلومټره تېزوالی (سرعت) لري.
د فلورېنس ځواک که څه هم له څلورو څخه یوې درجې ته راټیټ شوی خو اټکل کونکی وايي چې بیا هم کولای شي مرګوني ګوزار ولري.
د شمالي کېرولاینا والي رویې کوپر وویل: "دا طوفان به ویجاړونکی اغیز ولري او ویجاړی به رامنځ ته کړي. "
چارواکي وايي، په شمالي کېرولاینا کې د فلورېنس له راتګ سره ۳۲۱۰۰۰ خلک تر اوسه له برېښنا (بجلۍ) څخه محروم شویدي.
د کرېون سیمې چارواکي وايي، تر اوسه پورې ورته له ۱۵۰ زیاتو کسانو د ژغورل کېدو لپاره ټیلیفونونه کړیدي ځکه وايي اوبه یې کورونو ته اوښتي دي.
چارواکي وايي، دوی اړینو کسانو ته باور ورکړی چې د ژغورونکو ډله به ورته ځان ورسوي او د هغوي تر رسېدو پورې دې دوی د خپلو کورونو په لوړو پوړونو کې پاتې شي.
د فلورېنس سمندري طوفان د زیارت یا پنجشنبې په ورځ د شمالي او جنوبي کېرولاینا سمندري غاړو ته رسېدلی وو چې ورسره تېزه سیلۍ او باران هم یوځای وو.
چارواکي اټکل کوي چې د شمالي کېرولاینا په ځینو برخو کې به ۱۰۱ سانتي متره باران وشي او کیدای شي د طوفان څپې له څلورو مترو څخه لوړې شي چې دا به له ډیرو کورونو څخه هم لوړې وي.
د امریکا دفاع وزارت یا پنټګان په کېرولاینا کې دوه بېړۍ ځای پرځای کړي او د سمندري ځواکونو یو ټولی یې ګمارلی چې د اړتیا په صورت کې له خلکو سره مرسته وکړي.
همدارنګه د ژغورنې هیلې کوپټرې او ټرکونه هم په مهمو برخو کې ځای پرځای شویدي.
د امریکا ولسمشر ډانلډ ټرمپ ویلي، د خلکو ژغورل یې په کاري لومړیتوبونو کې دي او سپینه ماڼۍ چمتو ده چې اغیزمنو خلکو ته هر ډول اړینه مرسته ورسوي.