د کراچۍ د ترهګرۍ د قضيو اورېدونکي عدالت د قامي اسمبلۍ غړي او پښتون ژغورنې غورځنګ مخکښ علي وزير د ضمانت خواست رد کړو او د هغه سره د بندي نورو پينځه کسانو ضمانت يې منظور کړو.
د قامي اسمبلۍ غړي او پښتون ژغورنې غورځنګ (پي ټي اېم) د مخکښ علي وزير او نورو وکيل قادر خان اېډوکېټ وي او اې ډیوه سره په خبرو کې وويل، د کراچۍ په مرکزي زندان کې دننه د ترهګرۍ 12م نمبر عدالت نن د شورو/ چارشنبې په ورځ د ضمانت په خواست فېصله محفوظ کړې او ناوخته يې واوروله.
"د علي وزير او د هغه د نورو ملګرو د ضمانت درخواست ؤ چې په هغې دلايل محفوظ کړی شوي او جج ارډر وکړو چې د علي وزير درخواست یې مسترد کړو او نورو پينځه ملګرو ضمانت منظور شو".
قادر خان اېډوکېټ وویل د عدالت څخه ورته تفصيلي فېصله نه ده ترلاسه شوې د تفصيلي فېصلې څخه به مالومه شي چې د هغه د ضمانت خواست ولې رد کړی شوی دی.
هغه زياته کړه اوس به د علي وزير د ضمانت دپاره سيند هايکورټ ته خواست کوي.
عدالت نن د علي وزير نه علاوه د پي ټي اېم د کراچۍ د مشرانو او غړو نورالله ترين، محمد شېر مسيد، شېر ايوب، حسن الله او بصير الله ضمانت منظور کړی دی.
په کراچۍ کې پولیسو د پي ټي اېم د غړو په ګډون نور 33 کسان په 31م جنورۍ هغه وخت نيولي چې د پي ټي اېم د غړو په وېنا دوی د ارمان لوڼي او نقيب مسيد د تلين په مناسبت غونډه تابيا کړې وه.
پوليس تور لګولی ؤ دوی احتجاج له راغلو کسانو غټ سړک بند کړی او په پولیسو يې ګوزارونه کړي وو، خو د پي ټي اېم غړو دغه تورونه رد کړي وو.
قادر خان وايي په دغو کسانو کې پينځه تنه د علي وزير او نورو سره د اووم دسمبر په مقدمه کې عدالت ته وړاندې کړی شوي او په نورو د اړي ګړي جوړولو او په پوليسو د حملې د مادو لاندې مقدمه درج کړی شوې او جېل ته لېږل شوي دي.
پي ټي اېم په شپږم دسمبر په کراچۍ کې جلسه کړې او په اووم دسمبر د کراچۍ په سهراب ګوټ تاڼه کې د دوی پرضد مقدمه درج شوې چې پکې ويل شوي جلسې ته په وېنا کې د پي ټي اېم مشر منظور پشتين، علي وزير، محسن داوړ او نورو وېناګانې کړې او د رياستي ادارو، د پاکستان د پوځ، پوليس او رېنجرز پرضد يې د سپکاوي د شر نه ډکه او ناوړه ژبه کارولې وه.
د پوليس په مقدمه کې ویل شوي ؤ د پي ټي اېم مشرانو د 1800 نه 2000 پورې راټولو شوؤ کسانو ته وېناګانې کړې وې.
په ياده مقدمه کې علي وزیر په 16م دسمبر د پېښور پوليسو نيولی او بيا کراچۍ ته رامنتقل کړی شوی ؤ.
د علي وزیر د ګرفتارۍ پرضد چې پي ټي اېم په 18م دسمبر احتجاجي مظاهرې اعلان کړې وې د دغو مظاهرو په مهال په کراچۍ کې د پي ټي اېم مشر نور الله ترين او وروسته بيا نور درې کسان نيول شوي وو.
محمد شېر مسيد بيا په 20م دسمبر نيول شوی ؤ.
د پاکستان پوځ او حکومت وخت په وخت د پي ټي اېم لخوا په ادارو لګول شوي تورونه رد کړي ځواب يې ورته ويلی او که څه هم د پاکستان د پوځ پخواني وياند مېجر جنرل اصف غفور څو ځله دا خبره هم کړې چې د پي ټي اېم ځينې غوښتنې سمې دي خو په يوه خبري غونډه کې يې په پي ټي اېم تور پورې کړی ؤ چې پي ټي اېم ته د بهر هېوادونو څخه پېسې مېلاويږي.
هغه ويلي ؤ "د اسلام اباد په دهرنا کې چې د دوی تر ټولو لومړۍ دهرنا وه د هغې دپاره د هند استخباراتي ادارې (را) دوی ته څومره پېسې ورکړې وې".
هغه تور پورې کړی ؤ چې پي ټي اېم د غليم په لمسه د پاکستان د پوځ د بدنامولو کوششونه کوي.
د پاکستان د پوځ مشر جنرل قمر جاوېد باجوه په خپله هم ويلي ؤ چې دوی د هايبرډ جګړې سره مخامخ دي او د هېواد د زلمی کول يې بې لارې کول کيږي.
خو د پي ټي اېم مشرانو بيا د پاکستان د پوځ تورونه رد کړي چې د بهر هېوادونو څخه يې پېسې اخستې او د دغو تورونو ثبوت يې غوښتی ؤ.
پي ټي اېم وايي د پاکستان د ائين لاندې د خپلو حقونو دپاره پرامنه مبارزه کوي.