امریکې د القاعده برصغير يا هند د لويې وچې او تحریک طالبان پاکستان مشران نړيوال ترهګر ګرځولي دي، او په افغانستان کې د ترهګرۍ د زیاتېدونکو ګواښونو ضد مبارزې ژمنه يې کړې ده.
د امريکې د بهرنيو چارو وزارت د القاعده برصغير مشر [امیر] اسامه محمود، مرستیال مشر عاطف يحیا غوري، محمد معروف د القاعده د ګمارنې مسول، او تحریک طالبان پاکستان دويم مشر قاري امجد ځانګړي نړيوال ترهګر ګرځولي دي.
ويل شوي قاري امجد په خېبرپښتونخوا کې د عملياتو او تندلارو څارنه کوي. قاري امجد د ملګرو ملتونو د کال 2020 په يو رپورټ کې هم د تحريک طالبان پاکستان مرستيال ياد کړی شوی وو.
پرون د زیارت/ پنجشنبې په ورځ [لومړي دسمبر] د امریکې د بهرنيو چارو وزارت په وېب پاڼه خپور شوي بیان کې د بهرنيو چارو وزير انتوني بلينکن ويلي، امریکا ژمنه ده چې په افغانستان کې د القاعده برصغير او تحریک طالبان پاکستان لخوا د ګواښونو مخنيوي وکړي.
هغه ويلي دا د ترهګرۍ ضد مبارزې هغه نه ستړې کېدونکې لړۍ ده چې افغانستان بيا د نړيوالې ترهګرۍ دپاره ونه کاريږي.
په بيان کې زياته کړی شوې کوم کسان چې نړیوال ترهګر ګرځول شوي په امریکا کې د دوی اثاثې ضبط شوي او امريکايان د دغو کسانو سره د ورکړې راکړې څخه منع کړی شوي دي.
د امریکا د بهرنیو چارو وزير ویلي، دغه ګام يې چې پورته کړی دا د هغې ژمنې دوامداره ساتلو لړۍ ده چې نړيوال ترهګر بيا د دې جوګه نه شي چې د افغانستان خاوره د نړيوالې ترهګرۍ دپاره وکاروي.
امریکې دا ګام په داسې حال کې پورته کړی چې تحریک طالبان پاکستان په 28 نومبر د پاکستان د حکومت سره ډز بندي ختمه کړې او په ټول ملک کې د حملو کولو وروسته يې په 30 نومبر په کوټه کې د پوليسو په ټرک ځانمرګی بريد او له دغې وروسته د نورو بريدونو زمه وارۍ هم منلي دي.
پرون د زيارت/ پنجشنبې په ورځ [لومړي دسمبر] د پاکستان د کورنیو چارو وزیر رانا ثناالله ویلي چې تحریک طالبان پاکستان د افغانستان او پاکستان په ګډون د ټولې سیمې لپارہ خطره ده.
هغه ويلي، "زمونږ ګاونډي او ورور ملک افغانستان چې د پاکستان له لوري ورته هر ډول مرستې او کومک ورکول کېږي، د هغوی لپاره هم بايد دا د فکر وړ خبره وګرځي".
امریکې په لومړي اګست په کابل کې د ډرون بريد د لارې د القاعده مشر ایم الظواهري وژلی او ويلي يې وو د طالبانو حکومت د القاعده مشر ته په ځای ورکولو د دوحې د تړون سرغړونه کړې ده.
خو طالبانو دغه بريد غندلی او د دوحې د تړون سرغړونه يې ورته ويلې وه. په افغانستان کې د تير کال د اګست د مياشتې راهسې واکمن طالبان وايي د دوحې تړون ته ژمن دي چې د افغانستان خاوره به د نړيوالې ترهګرۍ دپاره کارېدو ته نه پرېږدي.