د اسلام اباد يو ځایي عدالت نن د جمعې په ورځ د پښتون ژغورنې غورځنګ د مخکښ مشر او د پاکستان د قامي اسمبلۍ د پخواني غړي علي وزير او د پي ټي ايم د يو بل فعال ولسيار د پلټنو وفاقي ادارې اېف آی ای په نور حراست کې د ساتلو خواست رد کړی او دواړه یې په جوډیشل ریمانډ جېل ته لېږلي دي.
د باره کهو تاڼې مقدمه کي تېره اوونۍ د زندان څخه له خوشي کېدو وروسته اېف آی ای على وزير د اډياله جېل د دروازې څخه نيولی وو او وروسته بیا جج شبير بهټي په ټولنیزو رسنیو د رياست ضد مواد خپرولو په قضيه کې د پلټنو مرکزي ادارې (اېف آی ای) ته سپارلی وو.
نن په عدالت کې ددغې قضیې له اوریدنې وروسته د پي ټي ايم وکيل مصدق عزيز وی او اې ډيوه ته وويل " على وزير باندې څلور ايف آی ارز وؤ، تېره اوونۍ یې د اډياله جيل نه بيا نيولی وو او د درېوؤ ورځو په جسماني ريمانډ اېف آی ای ته سپارل شوی وو.
هغه وایي جج په نننۍ اوریدنه کې د علي وزير نور ريمانډ اېف آی ای ته ورنه کړو او هغه یې بنديخانې ته واستولو. مصدق عزیز وایي اوس به دوي د اېف آی ای ځانګړي جج سره د علي وزيرد ضمانت لپاره خواست جمع کوي.
د پي ټي ايم يو بل وکيل سميع الله ډيوه ته ویلي چې دوى سپېشل جج سره د ضمانت خواست جمع کړی او د راتلونکى ګل- دوشنبې په ورځ د سپټمبر په 18مه نېته به په دې خواست اوریدنه کیږي.
علي وزير، د بشري حقونو فعاله او وکيله ايمان مزاري او د پي ټي ايم يو شمير فعالان د اګست په 20مه په اسلام اباد کې د پښتون ژغورنې غورځنګ یوې جلسې ته له وینا کولو دوه ورځې وروسته د ترهګرۍ ضد محکمې لخوا په مبينه بغاوت، ترهګرۍ او د ترنول پوليس لخوا د اړي ګړي او سرکاري کار کې د لاس وهنې او بغير د اجازې دجلسې کولو په مقدمو کې نيول شوي وؤ.
دبشري حفونو فعالې ايمان مزاري ته د سپټمبر په 2مه نېټه د ترهګرۍ په يوه مقدمه کي له نيول کېدو وروسته د عدالت لخوا ضمانت ورکړی شوی وو.
په ټولنيزو رسنيو رسنیو خپرو شوؤ ویډيو ګانو کې لیدل کیږي چې اسلام اباد کې د پي ټي ایم جلسې ته ویناوال د جبري لادرکیو په پېښو په پوځ او استخباراتي ادارو نيوکې کوي خو پوځ په بېلابېلو وختونو کې په جبري لادرکیو کې د لاس لرنې تورونه په سختۍ سره رد کړي دي.
د اګست په 28مه عدالت د بغاوت په قضيه کې علي وزير ته ضمانت ورکړی وو خو د اسلام اباد پوليس لخوا د ترهګرۍ په يوه بله مقدمه کي دوباره نيول شوی وو او په دې کې د ضمانت کېدلو وروسته د باره کهو پوليس له خوا په يوه بله مقدمه کې د تير خالي- شنبې په ورځ بيا هم د جېل د دروازې څخه د راوتلو په وخت ګرفتار کړل شو.
څېړونکي او د مدني ټولنې فعالان وایي چې علي وزير او د پي ټي ايم نور فعالان پرله پسې ځکه ځورول کيږي چې خپل اییني حقوق غواړي او د پاکستان په پوځ په پخوانیو قبایلي سيمو کې د بشري حقونو څخه د سرغړونو تورونه لګوي.
وي او اې ډيوه سره خبرو کې سياستمدارې او د مدني ټولنې فعالې عصمت شاهجهان وويل، "د پي ټي ايم په فعالینو رياستي بريدونه روان دي".
هغه وایي "هغه هيواد چې جنګ یې خپل اقتصاد جوړ کړی وي او د ټولو فيصلو واک یې هم د پوځي قيادت سره وي او جنګ یې د ټولو نه غټ کاروبار وي هغه رياست ته چې د امن خبره کوې نو هغوى امن ترهګري ګڼي".
د پاکستان په پوځ دا تورونه مخکې هم لګېدلي چې د ترهګرۍ په ضد جګړه کې یې له امریکې 33 ارب ډالره اخیستي، خو په پوځي عملیاتو کې یې د ترهګرو پر ځای عام خلک وژلي دي، مګر پوځ دا تورونه په کلکه رد کړي او وایي په عملیاتو کې یې ترهګري په بشپړه توګه ځپلې وه.