نړيوالې مالياتي ادارې آی اېم اېف په سږني کال کې د پاکستان د اقتصاد د 2.5 فيصده شرحې سره د ودې اټکل کړی او وایي چي په روان مالي کال کې به د ګرانۍ کچه هم 23.6 فيصده وي.
د اقتصادي چارو کارپوهان وايي په کوم حساب سره چې د پاکستان ابادي سېوا کېږي نو په هغه شرحې سره یې اقتصاد وده نه کوي چې په راتلونکي کې په بې رورګارۍ او غريبۍ کې د لا نورې اضافې سوب ګرځي.
نړیوالې مالياتي ادارې آی اېم اېف د نړیوالې اقتصادي منظر نامې په اړه جاري کړي خپل تازه رپورټ کې په روان مالي کال کې د پاکستان د اقتصادي ودې تر 2.5 فيصده پورې د رسېدو اټکل کړی دی او ویلي یې دي چي په کال 2028م کې ددې هېواد د اقتصادي ودې کچه به تر 5 فيصدى پورې رسېدای شي.
اقتصادپوه ډاکټر ساجد امين وي او ای ډیوه ته وایي "که مونږ دا تسلیم کړو چې راروان پينځه کاله پس به د پاکستان اقتصاد د 5 فيصدى شرحې سره وده وکړي خو يوه خبره یاد ساتل پکار دي چې خلکو ته روزګار ورکولو لپاره باید چې اقتصاد د 7 او 10 حساب سره وده وکړي، ځکه چې زموږ اقتصادي وده د روزګار پېدا کولو کم توان لري".
د آی اېم اېف ددې تازه اټکلونو مطلب دا دی چې نړيواله مالياتي اداره د پاکستان د اقتصاد زر تر زره د بحالۍ تمه لري خو د آی اېم اېف لخوا د اقتصادي ودې کچه په روان مالي کال کې ددې هیواد د حکومت له لوري د ټاکل شوي 3.5 فيصدى نه کمه ده.
نړيوالې مالياتي ادارې د لومړي مالي کال 2023 لپاره په پاکستان کې د ګرانې تخمينه 27 فيصدى لګولې وه خو دې ته یې د بيا کتنې په ترڅ کې دا کچه 29.2 فيصدي ته جګه کړې ده او په ګوته کړې یې ده چې د روان مالي کال په پائ کې د ګرانې کچه 17.5 فيصدي ته ښکته کېدای شي.
هم دا ډول آی اېم اېف په مالي کال 2023 کې د پاکستان دننه د بې رورګارې د شرحې تر 8.5 فيصدى پورې د سېوا کېدو اندازه لګولې وه خو اوس یې په روان مالي کال کې ددې کچې تر 8 فيصدى پورې د ټيټيدو اټکل کړی دی.
کال 2022م کې د هېواد دننه د بې روزګارۍ کچه 6.2 فيصدى پاتې شوې وه.
د اقتصادي چارو کارپوهان وايي د آی اېم په دې تازه رپورټ کې د پاکستان د اقتصاد لپاره د خوشالۍ هېڅ خبر نشته.
داقتصادي چارو کار پوهه اؤ خبریال مهتاب حېدر وي او ای ډيوه ته وایي،آی اېم اېف د روان مالي کال لپاره د پاکستان د اقتصادي ودې 2.5 پورې د رسېدو اټکل کوي چې بیخي کمه وده ده،
هغه وایي "نړیوال بانک دا کچه 1.7 فيصدى یادوي. دا ښي چې په کوم حساب سره د پاکستان ابادي وده کوي هم دومره اقتصاد وده کوي او ددې په مقابله کې ګراني هم زياتېږي. دا وده به هېڅ ګټه و نه لري"
نړيواله مالياتي اداره آی اېم اېف په خپل رپورټ کې د پاکستان په ابادۍ کې د 2.6 فيصدي شرحې سره د اضافې اټکل کوي چې د څېړونکو په وېنا د اقتصادي ودې څخه زياته ده او وايي ددې معنا به دا وي چې په هېواد کې به بې روزګاري او غربت سېوا کېږي.