شمالي وزیرستان کې لس کاله وړاندې ترسره شوو ضرب عضب پوځي عملیاتو په پایله کې بې کوره شوو متاثره خلکو د دوو ورځو د احتجاج وروسته، حکومت د دوی د ستونزو د کمولو لپاره د بنو بکاخېل کېمپ کې یو ډسک يا معلوماتي مرکز جوړ کړی دی. په دې ډسک کې د هغو کورنیو تصدیق روان دی، چې میاشتني مرستې یې بندې شوي دي.
د دې ترڅنګ حکومت د متاثره کورنیو لپاره د تېرو دوو میاشتو 72 کروړه روپۍ مرستې جاري کړې دي، او د راتلونکو دوو میاشتو لپاره مرستې به په جنورۍ کې ورکړل شي.
حکومت دغه مرستې وروسته له هغې جاري کړې، چې اغېزمنو د یوې اوونۍ راهسې احتجاجي پرلت وکړ.
کډوال فضل امین وايي، "ډیسک خو جوړ شوی، خو مونږ به نور ستونزې ونه زغمو، باید زر عمل وشي. مونږ ته له تېرو دوو کلونو راهیسې هېڅ مرسته نه ده راکړل شوې".
اغېزمنو خلکو د تېرو اوو ورځو راهیسې په بنو بکاخېل کیمپ کې د خپلو غوښتنو لپاره په پرلت ناست وو. د دوی په وینا، په تېرو څلورو میاشتو کې ورته میاشتنۍ مرستې نه دي ورکړل شوې، او 2000 څخه زیاتې کورنۍ د تېرو دوو کلونو راهیسې د مرستو څخه بې برخې شوې دي.
دوی د ژمي لپاره نوي خیمې، بنیادي اړتیاوې، او نور مهم سامانونه غواړي، او وايي په کېمپ کې د اسانتیاوو نشتوالي سختې ستونزې جوړې کړې دي.
دکډوالو مشر ملک سید ګلزار وايي، "زمونږ خیمې ډېرې زړې دي، د ژمي یخنۍ کې ساتنه نه شي کولی. دلته د پردې، برېښنا، اوبو، تعلیم او روغتیايي اسانتیاوو نشتوالی دی".
په 2014م کال کې د پاکستان پوځ شمالي وزیرستان کې په پراخه کڅه کې د ضرب عضب په نوم پوځي عملیات وکړل، په نتیجه کې یې لسګونه زره خلک مجبور شول چې خپل کورونه پرېږدي او کډوالۍ ژوند ته اړ شي.
د پی ډي ایم ای د معلوماتو له مخې، اوس مهال 17,000 متاثره کورنیو ته هره میاشت 20,000 روپۍ د مرستو ورکول کېږي، او د اندراج وروسته به نورو کورنیو ته هم مرستې ورکړل شي.
د پي ډي ایم اې د کډوالو انچارج نور زمان وايي، "هرې کورنۍ ته د دوو میاشتو لپاره 40,000 روپۍ ورکړل شوې دي، او د راتلونکې میاشت لپاره نور فنډونه به هم زر جاري شي".
د متاثره خلکو په وینا، دوی نور د کډوالۍ په دې ژوند ستړي شوي دي او غواړي چې خپلو سیمو ته ستانه شي. بلخوا، د حکومتي او پوځي چارواکو په وینا، په سیمو کې د پاکۍ عمل لا هم روان دی.