د خیبر پښتونخوا په جنوبي ضلع ټانک کې حمله کوونکو د زیارت، پنجشبې، په ورځ د جنوبي وزیرستان ضلعې د مالي چارو په دفتر یا په اکاؤنټ آفس ډزې وکړې او یو پولیس يې ووژلو او بل يې زخمي کړو.
د ټانک پولیسو ویاند محمد ابراهیم وویل مسلح کسانو د اکاؤنټ دفتر په ساتنه مامور پولیس ناڅاپه په هدف کړل او په ډزو کې يې یو پولیس اهلکار يې په موقع وژلو او بل په ژوبل حالت کې روغتون ته ولېږدول شو.
د جنوبي وزیرستان اکانټ افس د ټانک په انتهايي حساسه برخه ظفر اباد کې موقیت لري چېرته چې د جنوبي وزیرستان او د ټانک ضلعو انتظامي دفترونه عدالتونه او د زاندان ترڅنګ د پولیسو مرکزونه او د ایف سي ځواک قلعه هم موجود ده.
ډاکټرانو هسپتال ته د منتقل شوي ټپي پولیس حالت د اندیښنې وړ وبللو.
د پولیس چارواکو په وینا، د حملې وروسته پولیسو په فوري ډول په سیمه کې د پلټنې عملیات پيل کړل او په جوابي ډزو کې یو بریدکونکي د زخمي کېدو مالومات ترلاسه کړي دي.
د دوی په وینا پولیس او امنیتي ځواکونه سیمې ته رسېدلي او سیمه یې په ګیره کې اخستې او ځايي پرځایی د پولیسو ناکې لګېدلې دي،چې د تګ راتګ په لارو د خلکو تلاشي کېږي.
ځایي خلک وايي که څه هم وسله وال تر برید وروسته تښتېدلي خو ډیر ساعته د امنیتي ځواکونو له پوستو څخه ډزې روانې وې چې خلک يې په ویره اخته کړي وو.
د ټانک ضلعې پولیس وايي د وژل شوي او ژوبل پولیس اهلکارو تړاو د جنوبي وزیرستان پولیس سره دی او د دفتر په ساتنه مامور وو او یاد دفتر د دې نه وړاندې د امنیتي اندېښنو له امله ډیره اسماعیل خان ته انتقال کړل شوی وو.
ټانک هغه ضلعه ده چې پولې يې د جنوبي وزیرستان سره لګېدلې دي او په تېرو وختونو کې هم په ټانک او جنوبي وزیرستان کې پولیس او امنیتي ځواکونه په حملو کې په نخښه شوي دي.