د پښتو ژبې ستر لیکوال، شاعر، ادیب اؤ ماهر تعلیم پروفیسر جهانزیب نیاز د جمعې په ورځ د ورپیښې ناروغۍ له امله د 88ؤ کالو په عمر کې وفات شوی اؤ ټاکل شوې هم نن ماښام اؤوه بجې د چارسدې د رځړو په پخپله پلرنۍ مقبره کې خاورو ته سپارل کیږي .
ارواښاد پروفیسر جهانزیب نیاز د خدایي خدمتګار تحریک د باني عبدالغفار خان ( باچا خان) د خور زوئ یعنې خوریی اؤ د عوامي نیشنل پارټۍ د موجوده مشر اسفندیار ولي خان سکه ماما ؤ.
هغه د پښتو د ګڼو علمي ، ادبي، تحقیقي اؤ تاریخي کتابونو مصنف، مولف اؤ محقیق ؤ.
پروفیسر جهانزیب نیاز په په 2م جون کال 1927ء کې د چارسدې د رځړو په سیمه کې د برهان خان په کور کې سترګې پرانستې وې اؤ ابتدایي زده کړې یې هم د خپل کلي د یو مکتب څخه کړې وې .
وروستو هغه د جغرافیې د یو استاد په توګه په پیښور پوهنتون کې په زرګونو شاګردان روزلي وؤ.
هغه په خانداني توګه یو خان ؤ خو پخپله یوه مرکه کې یې وائس اف امریکه ډیوه راډیو ته وئیلي وؤ چې د ملنګۍ اؤ غریبۍ ژوند یې ډیر خوښیږي همدغه وجه ده چې د خانانو اؤ افسرانو پځایې د خپلې ژبې غریبو لیکوالو،شاعرانو، ادیبانو په پښتو مئینو خلکو سره محفلونو راجوړولو ته اولیت ورکوي.
پروفیسر جهانزیب نیاز په بنیادي ډول د تعلیم د میدان سره تړلی ؤ اؤ دپيښور پوهنتون د پښتو ډیپارټمنټ د چئیرمین په شمول یې په ګڼو مهمو عهدو خپلې ذمه وارۍ ترسره کړې وې .
ارواښاد د باچا خان په خدایي خدمتګار تحریک کې هم فعاله برخه لرله اؤ د قیوم خان د حکومت په دور کې څوڅو ځل جیلونو ته اچول شوی ؤ.
د ګڼو نورو کتابونو ترڅنګ یې د ګبین اؤ زما دنیا په نوم د شاعرۍ دوه مجموعې، زما د ژوند قیصه په نوم د سیاسي ، تعلیمي اؤ ادبي ژوند احوال په کتابي بڼه ، غني غني دی د مقالو مجموعه چاپ دي اؤ ددې ترڅنګ یې د دستار په نامه یوه پښتو مجله هم چلوله چې هغه یې پخپله چیف ایډیټر ؤ.
نوموړي د ستر پښتون قام پرست مشر خان عبدالولي خان هاغه خطونه هم په کتابي بڼه چاپ کړي وؤ چې د خپل بند په دوران کې ورته ولي خان د مختلفو زندانونو څخه رالیږلي ؤ.
ددې ترڅنګ ستر فلسفي شاعر غني خان هم په خپل یو نظم کې د پروفیسر جهانزیب نیاز سره د مینې څرګندونه کړې وه.
نوموړی د تیرې ډیرې مودې راهسې د ناروغۍ له امله په کټ پروت ؤ اؤ د جمعې په ورځ یې ساه ورکړه.
د پښتو بیلابیلو ادبي تنظیمونو اؤ لیکوالو شاعرانو د پروفیسر جهانزیب نیاز مړینه د پښتو شعر و ادب میدان د پاره یوه لویه ضائعه ګرځولې ده
