تاسو ته ياد دي کنه کله چې به په تيرو وختونو کې خلک د کلي څخه ښار ته تلل يابه دښار څخه کلو ته تلل نو دپوخ تارکولي سړک په څنگ کې به يوه نرۍ کندې کپرې لاره تيره شوې وه چې ددغه لارې په سر به ټانگي وال ماما خپله ټانگه ودرولې وه اؤ د سورلو په انتظار کې به پخپله چرته د ونې سيوري ته ناست ؤ.
دټانگې دغه سورلي کۀ به يوخوا ښه ارزانه اؤ دسهولت ډکه وه نو بلخوا به يې د خوند هم جواب نۀ ؤ ځکه چې ټانگه خو هسې هم په روايتي ډول د نوابانو یا شاهي سورلي گڼل کيږي.
خو اوس کۀ چرته د پخو تارکولي سړکونو څخه بيلې شوې هغه کچه لارې په پخو تورو سړکونو بدلې شوي دي نو هلته د ټانگي وال ماما ټانگه هم په نظر نۀ راځي البته د ټانگې هغه زوړ سټاپ ضرور شته خو په دغه سټاپ اوس د ټانگو پځايې دموټرسائيکل څخه جوړې رکشې چې چنگ چي ورته وايي ليدل کيږي
دغه رکشه په اصل کې موټر سائيکل وي ، خو په موټر سائيکل درکشې په څير لويه باډي وتړل شي چې ټائرونه يې هم ددوؤ پځايې په دريوؤ بدل شي او پکې دډرائيور په گډون په يو وخت داوؤ کسانو څخه نيولې تر دلسو کسانو کښينولو گنجائش وي.
چنگ چي رکشې اوس دپاکستان دټولو سيمو پشان په خيبرپښتونخوا کې هم دومره رواج شوي چې دښارونو ترڅنگ دکلو بانډو په وړو ، وړو لارو هم ليدل کيږي.
دچنگ چي رکشو رامينځته کيدو له امله که يو خوا په لکونو خلکو ته په خيبرپښتونخوا کې ارزان منافع بخش روزگار په لاس ورغلى دى نو بلخوا سورلۍ هم په چنگ چي رکشو کې تگ دخپل وخت او پيسو بچت گڼي.
دچنگ چي رکشوډرائيوران عموماً ديو سټاپ څخه بل سټاپ پورې ديوې سورلۍ څخه دپينځوؤ څخه نيولې تر لسو روپو کرايه اخلي.
په کلو بانډو کې که دچنگ چي رکشو رواج کيدو دټانگې په روايتي سورلۍ منفي اغيزې کړي دي، نو په لويو ښارونو کې په چليدونکو رکشو او ډکسيانو هم دچنگچي داثراتو څخه ډرائيوران خوشحاله نۀ ليدل کيږي.
خو هم دپيښور يو بل ټيکسي ډرائيور فضل غني بيا دحضرت ددغه خبرې سره اتفاق نۀ کوي او وائي چې چنگ چي کې به چرته ډير غريب سړى دمجبورۍ په وجه ځي، گنې زياتره خلک اوس هم رکشو او ټيکسيانو ته اهميت ورکوي.
دخالد په نوم 25 کلن ځلمى چي هم دپيښور په يو سرکاري کالج کې سبق وائي او هم په فارغ وخت کې چنگ چي رکشه چلوي، دچنگ چي رکشو په رواتلو خوشحاله دى او وائي چې مخکې به يې دسبق وئيلو له امله دخپل غريب پلار سره دکور په خرچو چلولو کې لاس امداد نۀ شو کولى ، خو اوس يې چنگ چي رکشه په قسطونو اخستې او دکالج څخه له رخصتۍ وروستو چې کله دښار سړکونو ته دغه چنگ چي رکشه وباسي نو په اسانه ترماسخوتنه 600 يا 700 روپۍ مزدوري کوي.
هغه وويل که چري دچنگ چي سټينډ يا اډې دورځې فيس 110 روپۍ ترې ټيکه دار نۀ اخستو نو بيا به يې مزدوري نوره هم خوږه وه.
دپيښور اوسيدونکي 60 کلن محمد بشير چې روزانه روزگار دپاره سحر ماښام چنگ چي کې سفر کوي ډيوه ريډيو ته وويل چنگ چي دغريبو خلکو دپاره ښه سهولت دى خو په خوند کې دټانگې سورلۍ ته نۀ رسي.
