د ګلګت بلتستان په مرکزي ښارکې ډاکټر اسامه رياض چې درې ورځې وړاندې د کرونا په رنځ اخته شوی ؤ د اتوار په ماښام ځايي روغتون کې مړ شوی دی.
د ګلګت بلتستان د اطلاعاتو وزير شمس مير وي او ای ډيوه ته وويل ، ډاکټر اسامه په ګلګت کې د کرونا وایرس څارملنې په يو مرکز کې خپله وظيفه تر سره کوله چرته چې د ايران تفتان څخه په لويه شميره زايرين رارسېدلي وو.
شمس مير وويل، "ډاکټراسامه د دغو ناروغانو په خدمت کې شپه او ورځ لګيا ؤ خو د خپلې سيمې د اولس دکرونا څخه بچ ساتلو په جګړه کې يې خپل ژوند وبايلو".
نوموړي زياته کړه ډاکټر اسامه به تل د قامي اتل په حېث ياد ساتل کيږي.
د ٢٨ کلن ډاکټر اسامه پلار محمد رياض ډيوه ته وويل "د هغوی دپاره دا ډير يو مشکل وخت دی خو د خپل رب نه د زغم حوصله او همت غواړي".
ډاکټر اسامه چه د ګلګت ځايي اوسيدونکې ؤ داتوار،يکشنبې په ورځ خاورو ته وسپارلی شو.
د ډاکټراسامه څو ورځې وړاندې يوه ويډيو هم په ټولنيزو رسنيو خوره شوې چې پکې نوموړی د کرونا وايرس د ناروغانو څارملنه په داسې حال کې کوي چې د يو ماسک نه علاوه بل کوم حفاظتي بل څيز نه لري.
د سيمې د ډاکټرانو د اتحاديه په حکومت نيوکې کوي، چې ډاکټرانو ته د کرونا څخه بچ کېدو حفاظتي اسانتياوې نه ورکول کيږي او ډاکټر اسامه هم د دغه ډول اسانتياؤ له نيشتوالي له امله د کرونا په رنځ اخته شو.
