پاکستان د امریکې لخوا په ترکي د لګېدلو بندېزونو په تړاؤ سخته اندېښنه څرګنده کړې او ټينګار يې کړی چې ټولې مسلې دې د خبرو اترو د لارې هوارې شي.
امريکې د نهې/ سه شنبې په ورځ ويلي چې ترکي د روس څخه د اېس - 400 ډيفنس ميزايل نظام اخستو پرېکړه کړې ځکه په انقره بندېزونه لګوي.
پاکستان پرې ولې اندېښنه څرګنده کړې؟
د امریکې لخوا په انقره بندېزونه د پاکستان او ترکي ترمنځ د پوځي سازوسامان تړون اغېزمنولی شي.
د پاکستان د بهرنيو چارو وزارت د شورو/ چارشنبې په ورځ ويلي پاکستان به د هر هغه هېواد اصولي مخالفت کوي چې يو اړخيزه ګامونه پورته کوي.
ويل کيږي د ترکي کمپنۍ د پاکستان د سمندري ځواک د ګزمې دپاره جهاز او ټېنکر فليټ او ورسره یې فرانسي ابدوزونه ښه کوي.
له دې وړاندې په کال 2018م کې هم انقره د پاکستان سره د 30، ټي-129 برید کوونکو هيلي کاپټرو تړون کړی ؤ.
خو په دغه تړون کې هم څه پرمختګ نه ؤ شوی ځکه چې امریکا ترکي ته د دغو جنګي هيلي کاپټرو بل هېواد ته د ورکولو يا صادراتو لائسنس نه ؤ ورکړی.
ويل کيږي د پاکستان او د ترکي د جهازونو جوړولو يوې کمپنۍ ترمنځ بل تړون شوی چې دغه کمپنۍ به د پاکستان سمندري ځواک ته څلور ملګم جنګي جهازونه ورکوي.
د دغو جهازونو په اړه ويل کيږي چې د ريډار څخه د پټېدو توان لري.
پاکستاني چارواکي هيله لري چې د 2021 کال تر اخرې پورې ورته دغه جهازونه ترلاسه شي.
خو د جنګي جهازونو ملګم او ټي-129 کې کارېدونکې آلات امریکا ورکوي.
