د امریکې پوځ د افغانستان نه د وتلو تيارۍ پېل کړي دي، امریکايي پوځ نه يواځې چې خپل سامانونه انتقالوي بلکې د ځايي ټېکدارانو سره یې کړې معاهدې ختمول هم پېل کړي دي.
اېسوسي اېټډ پرېس خبري ادارې ويلي، دغه خبره د زیارت/ پنجنشبې په ورځ (22 اپرېل) د امريکې د دفاع محکمې يو چارواکي کړې ده.
په افغانستان کې دا وخت د امریکا 2500 او د نړيوالو اتحادي ځواکونو نزدې 7000 سرتيري موجود دي.
په 14 اپرېل د امریکې ولسمشر جو بایډن په رسمي توګه له افغانستانه د خپلو ځواکونو د ویستلو اعلان کړی او ویلي يې وو دغه هېواد ته د القاعده ډلې د ځپلو لپاره تللي وو او خپل هدف یې تر لاسه کړی نور په دې هېواد کې د پاتې کېدو جواز نه لري.
صدر بایډن ویلي وو د پاتې ځواکونو وتل به د مې له لومړۍ پېلوي د ستمبر تر 11 به یې بشپړوي.
امریکايي چارواکي خبري ادارې ته ويلي د صدر د اعلان نه وروسته امریکايي پوځ د افغانستان نه خپل سامانونه لېږل پېل کړي دي.
چارواکي د نوم نه څرګندولو په شرط ويلي تياريانې روانې دي خو په راتلونکو اوونيو کې به د پوځ وتل پېل نه شي ځکه چې څو پورې نورې چاؤڼۍ نه وي بندې کړی شوي.
د شورو/چارشنبې په ورځ د جرمني د دفاع وزير ویلي وو په کابل کې د نېټو د پوځي مشرانو د پلان جوړونکو ترمنځ خبرې روانې دي چې د څلورمې جولايۍ پورې د افغانستان نه د نړيوالو ځواکونو وتل ممکن کړي.
چاراکي ویلي امریکا به خپل پوځي سامانونه د هوا د لارې بيرته ليږي خو د افغانستان په شمال کې ځمکنۍ لارې هم کارولی شي.
اېسوسي اېټډ پرېس ویلي د طالبانو نه پوښتنه کړې چې د بيرته تلو په مهال به په امریکايي او نېټو په ځواکونو بريدونه کوي؟، د طالبانو په قطر کې د سياسي دفتر وياند محمد نعيم ویلي دا ویل به د وخت نه وړاندې وي.
تیر کال امریکا او طالبانو تړون کړی چې امریکا به د روان کال (2021) د مې د میاشتې پورې د افغانستان نه ووځي او طالبانو په تړون کې منلې وه چې د وتلو پورې به په امریکايي او نېټو ځواکونو بريدونه نه کوي.
خو طالبانو ویلي وو که امریکا د مې د لومړۍ نېټې خپله ژمنه نه ترسره کوي نو نتيجې بدلېدی شي.
