په خیبر پښتونخوا کې دقانوني چارو پوهان وايي چې په عدالتونو کې دججانو د کمي له امله يو شمېر قضيې د ځنډ ښکار دي او خلکو ته په سمدستي توګه انصاف نه ورکړل کیږي.
دوئ وايي د کېسونو په وخت نه فیصله کېدو سره په جيلونو کې بندي تنان د ضمانتونو نه کېدو له امله دستونزو سره مخ دي او د کومو تنانو چې ديواني مقدمې په عدالتونو کې روانې دي هغوئ ته هم مالي زيان رسي۔
بلخوا د پېښور هايي کورټ رجسټرار په وروستيو کې ميډيا ته ويلي وؤ چې په عدالتونو کې دججانو دکمي پوره کولو لپاره حکومت ته خواست شوی دی۔
د پېښور هايي کورټ نه دترلاسه شويو شمېرو ترمخه دا وخت د صوبې په عدالتونو کې 596 څوکو باندې 470 ججان کار کوي او 126 څوکۍ تشې پرتې دي۔
د پېښور هايي کورټ اېډوکېټ عامر چمکني وي او ای ډيوه ته وويل که يو خوا په کیسونو کې د ګواهانو او د وکيلانو په وخت دنه حاضریدو له امله مقدمې د ځنډ ښکار وي نو بل علت يې په عدالتونو کې دابادۍ تناسب سره د ججانو کمی هم دی۔
"که زمونږ دججانو صیبانو په تعداد کې اضافه وه نو په عدالتونو باندې به بوج کم ؤ او د هر يو کیس به په ښه طريقې سره پېروي کېدله،
هغه وایي "په هر کېس کې به ګواهان راتلل او د هر يو کیس د اوریدو نوبت به هم راتللو خو چونکې زمونږه د ججانو شمېر کم دی نو د هغې وجې نه هم کیسونه دځنډ ښکار شي، بيا که تاسو زمونږه ماتحت عدالتونو ته وګورئ نو دومره ججان نه دي څومره چې په هغوي د کار بوج سېوا دی"
پېښور هايي کورټ نه دترلاسه شويو شمېرو ترمخه د پېښور سترې محکمې کې د شلو ججانو پر ځائ 14 ججان کار کوي او په شپږو څوکو لا قاضيان نه دي بهرتي کړل شوي۔
شمېرې ښايي چې د صوبې په کچه دايډيشنل ډسټرکټ اينډ سيشن ججز 29 او د سول ججانو 97 څوکۍ لا هم تشې پرتې دي۔
د انګريزۍ ژبې دي نيوز اخبار د يو رپورټ ترمخه د خيبر پښتونخوا په ماتحت عدالتونو کې دا وخت د ديواني او فوجداري مقدمو 2 لکه او څه د پاسه 42 زره مقدمې د ځنډ ښکار دي۔
رپورټ زياتوي چې د ځنډ ښکار قضيو په نوملړ کې پېښور په ړومبي نمبر دی او 47 د ديواني او فوجداري عدالتونو کې 36،648 مقدمې د ځنډ ښکار دي۔
وايس اف امريکا ډيوه نيوز سره دخبرو په مهال د پېښور هايي کورټ ایډوکیټ فاروق اپريدي وېنا وه چې څومره د قضيو فېصلی د ځنډ ښکار کېږي نو هغه هومره مالي زيان او بدني ستړیاؤ سره عام ولس مخامخ کېږي،
دی وايي په وخت انصاف ورکولو لپاره بايد په عدالتونو کې د ججانو کمی د ابادۍ دتناسب مطابق پوره کړل شي۔
" نو ددې خراب اثر دا وي چې کوم غريبو عوامو وکيلانو ته فيسونه هم ورکړي وي هغه د ډېر وخت له پاره کړېږي او د هغې وجې نه بيا د خلکو په عدالتي نظام اعتماد ختمېږي"
دنوموړي په وینا چې کله فېصلې د ځنډ ښکار شي نو ددې له وجې چې کوم خلک په جېلونو کې پراته وي هغه متاثره شي او د هغوئ دخاندان غړي هم متاثره شي، بيا څه مقدمات زمونږ داسې دي چې زمونږ بېنچونه کم دي لکه د هايي کورټ بېنچونه، نو بيا د کېس له پاره د لرې لرې ځايونو څخه خلک راځي او په يو يو تن په زرګونو روپۍ تاوان راځي"
بلخوا د پېښور هايي کورټ رجسټرار د روان کال اپريل په 24 مه يوې خبري غونډې ته ويلي وؤ چې په عدالتونو کې د ججانو د کمي پوره کولو لپاره حکومت ته خواست شوی دی۔
