کوټه ــــ د بلوچستان په زیارت سیمه کې د پاکستان د پوځ د یو افسر تر وژل کېدو وروسته له هغه سره یو ځای د هغه د تښتول شوي خپلوان عمر جاوید مړی هم موندل شوی دی، د دوی د وژنې ذمه واري د بلوڅو یو وسلوال سازمان منلې ده.
د پوځ تر څارنې لاندې د کورونو جوړولو د سرکاري ادارې ډیفنس هاوسنګ اتھارټي یو افسر لېفټینینټ کرنل لایق بېګ مرزا او د هغه د تره زوی عمر جاوید د تېرې چارشنبې- شورو په شپه له زیارته کوټې ته د کورنۍ له نورو غړو سره روان وو چې وسلوالو وتښتول.
د دوی تر تښتول کېدو سمدستي وروسته پوځ په سیمه کې په وسلوالو پسې پلټنه پیل کړې وه، چې په عملیاتو کې یې له هیلیکاپټره هم کار اخیستی وو، خو وسلوالو د پوځ افسر لایق بېګ مرزا په ډزو وژلی وو.
د بلوچستان د کورنیو چارو وزارت یوه اعلی چارواکي د نوم نه ښودلو په شرط ویلي، چې د لایق مرزا خپلوان عمر جاوید هم تښتوونکو وژلی او مړی یې د شنبې- خالي په ورځ د زیارت په غرنۍ سیمه کې د باران په شېله (خوړ) کې موندل شوی دی.
د بلوچستان حکومت ویاندې فرح عظیم شاه هم د عمر جاوید د جسد د موندلو تایید وکړ. د بلوچستان د کورنیو چارو وزیر میر ضیاء لانګو د جاوید وژنه غندلې او له صوبې یې د "ترهګرۍ ختمولو" هوډ څرګند کړی دی.
د پاکستان د پوځ د عامه اړیکو څانګې ای ایس پي آر ویلي، لفټننټ کرنل لایق مرزا او د هغه د تره زوی عمر جاوید د جولای په 13مه او 14مه شپه هغه مهال وتښتول شول چې له زیارته کوټې ته روان وو:
"د لسو- دوولسو ترهګرو یوې ډلې لفټننټ کرنل لائق بېګ مرزا او د هغه د تره زوی عمر جاوید په داسې حال کې تښتولي چې د قایداعظم [محمد علي جناح] د استوګنځي تر لیدو وروسته د زیارت ورچوم سیمې ته نیژدې کوټې ته روان وو".
بلوچ لیبریشن آرمي، چې یو ناقانونه اعلان شوی وسلوال تنظیم دی، د لیفټیننټ کرنل لایق د تښتونې او وژنې ذمه واري مخکې لا منلې وه.
د تېرې پنجشنبې- زیارت په ورځ د آی ایس پي آر لخوا په خوره شوې اعلامیه کې ويل شوي چې دوه وسلوال د تښتونې وروسته د امنيتي ځواکونو په عملياتو کې وژل شوي دي.
د جمعې په ورځ د ای اېس پي آر د يو بل بيان له مخې د جولای په 14 او 15مه شپه د خوست سره نزدې په خلیفه غونډۍ سيمه کې د وسله والو يوه ځاله په نخښه شوه چې وایي له وسلوالو یې پاکه کړه.
د آی ايس پي آر ترمخه د دغو عمليات په دوران د وسلوالو په ډزو د امنیتي ځواکونو يو عسکر حوالدار خان محمد ووژل شو، خو وایي د ډزو په تبادله کې د بلوڅ لیبریشن آرمي پینځه نور وسلوال هم وژل شوي دي.
خو بل لوري ته د خپلواکي غوښتونکې بلوڅ وسلوالې ډلې بلوچ لیبرېشن آرمي ویاند جېند بلوڅ رسنیو ته ویلي چې په پوځي عملياتو کې د دوی لهد تنظيم سره اړه لرونکى کوم وسلوال نه دى وژل شوى.
