کوټه ــــ په پاکستان کې د موسم له بدلېدو سره سم د پنجاب صوبې له ميداني سيمو د افغانستان سرحدي سيمو ته د بلوچستان د موساخېل، شېراني، ږوب او قلعه سيف الله له لارې د کوچيانو راتګ پيل شي، چې د غرونو رغونو پر بېلابېلو لارو پياده مزل کوي.
په ږوب کې د ماشومانو د ناروغيو مختصص ډاکټر نعمت الله مندوخېل وايي، کوچيان د پوليو وايرس تر ټولو زيات وړونکي خلک دي.
د ډاکټر نعمت الله مندوخېل په وینا په افغانستان کې ممکن داسې سيمې وي، چې ماشومان د پوليو ضد نه وي وېکسين شوي، ځکه نو د کوچي ماشومانو د پوليو پر ضد وېکسين کول ډېر مهم دي:
"کوچي ماشومان د پوليو وايرس له يوې سيمې بلې ته وړونکي يا وايرس کېرير بلل کېږي ځکه نو د نورو سيمو ماشومان په وايرس اخته کولای شي".
کوچيان د بلوچستان له لارې په کال کې دوه واره د موسم له بدلېدو سره په پسرلي کې او د ژمي په را رسېدو د پنجاب او افغانستان ترمنځ سفر کوي او پر مختلفو سيمو تېرېږي.
په کوټه کې د پولیو نېشنل سټاف افسر ډاکټر افتاب کاکړ بيا وايي، چې په بلوچستان کې د افغان سرحدي سيمو پر لارو د ماشومانو د وېکسين کولو تر څنګ له سیند او پښتونخوا سره د بلوچستان پر غزېدلو ټولو لارو هم ماشومان وېکسين کېږي:
"د بلوچستان پر ټولو لويو لارو او له افغانستان سره په سرحدي سيمو کې د پوليو ويکسين ځانګړي مرکزونه يا ټرانزټ پواينټس جوړ شوي، چېري چې د پوليو ټيمونه پياده او په ټرانسپورټ کې تلونکي ماشومان د تګ راتګ پرمهال ويکسين کوي".
په بلوچستان کې که څه هم له تېرکال راهيسې د پوليو مثبت کېس نه دی رپوټ شوی، خو په پښتونخوا کې د روان کال لومړی ماشوم په ګوزڼ اخته شوی، ځکه نو د غبرګو صوبو تر منځ پر غزېدلو لارو د ويکسين کار هم زيات شوی دی.
