پولیس وایي د پښتو ډرامو یوه ځایي هنرمنده اؤ نڅاګره خوشبو وسله والو وژلې اؤ د هغې مړی يې د پېښور سره نزدې د نوښار د اکبر پوره تاڼې په حدود خوش مقام کې غورځولی دی.
د نوښار ضلعې د پولیسو مشر یا ډي پي او ښاغلي اظهر خان ویلي پولیسو د وژل شوې هنرمندې مړی د سیمې د خلکو په اطلاع د پټو نه ترلاسه کړی اؤ بیا یې د پوسټ مارټم لپاره د پبو میا راشد هسپتال ته رسولی دی.
بیلابیلو رسنیو ته د پولیسو مشر ویلي چې پولیس د وژنې مقدمه درج کړې اؤ د پېښې پلټنې یې پیل کړي اؤ زر به په دې وژنه کې ککړ کسان ونیول شي.
د وژل شوې هنرمندې خوشبو ورور شهریار پولیسو ته ویلي چې د هغوي تعلق د صوابۍ ضلعې سره دی خو فعلاً په پېښور کې اوسیدل.
د شهریار په مدعیت کې د پولیسو لخوا د درج ایف آي ار له مخې وژل شوې هنرمندې به ودونو ښادو کې نڅا کوله اؤ د شوکت اؤ فلک نیاز په نوم دوؤ کسانو هغه له نڅا منعې کوله .
د هنرمندې ورور پولیس ته ویلي چې خور یې د شوکت اؤ فلک نیاز په وینا له نڅا لاس نه اخستو نو ځکه هغوي وژلې اؤ مړی يې ورله د پېښور نه بهر په اکبر پوره سیمه کې په پټو کې غورځولی دی.
د هنرمندې ورور ویلي چې خور یې په یو شمیر پښتو ډرامو کې هم کار کړی دی.
تر دې وړاندې هم د خېبر پښتونخوا په بیلابیلو سیمو کې په مختلفو وختونو کې وسله والو یو شمیر هنرمندانې اؤ نڅا ګرې وژلي دي.
Forum