چين يو ځل بيا پاکستان کې د چينايانو په خونديتوب ټینګار کړی

پاکستان کې د چين سفير جيانګ زيډونګ ويلي، د چين پاکستان اقتصادي راهداري، سي پېک پروژه يو نوي پړاو ته داخله شوې، مرستې تر الېکټرک ګاډو او توانايۍ په څېر شعبو پورې پراخې شوي، خو ورسره نوموړي پاکستان کې د چينايي وګړو د خونديتوب سېوا کولو د هڅو ټينګار کړی دی.

د چين سفير دغه خبرې پرون په 25م اکتوبر اسلام اباد کې د چين سفارتخانه کې خبريالانو سره خبرو کې کړي دي.

هغه ويلي، د چين د وزيراعظم په وروستيو کې د پاکستان په سفر کې دوه اړخيزه خبرو ښې نتيجې مخې ته را روانې دي، چې پکې امنيتي مرستو ته بنيادي توجه ورکړل شوې ده.

نوموړي، پاکستان کې د چينايي وګړو او روانو پروژو کې د خوندیتوب دپاره مرستو سېوا کولو په خبره ټينګار کړی دی.

چين پاکستان کې د چينايي وګړو په خوندیتوب ټينګار په داسې وخت کې کړی چې د روانې مياشتې په شپږمه نېټه د شپې خواوشا 11 بجې د کراچۍ د نړيوال ميدان په خله کې د چینايانو په قافله بريد کې دوه چينايان وژل شوي او يو ژوبل شوی وو.

چين د دغه بريد سمدستي وروسته هم د پاکستان نه غوښتنه کړې وه چې د چينايي وګړو د خونديتوب دپاره ضروري ګامونه پورته کړي.

د کراچۍ د نړیوال هوايي ميدان نه بهر په چینايي قافله شوې چاودنې ته د کراچۍ پوليسو په خپل رپورټ کې ځانمرګی بريد ویلی چې د ګاډي د لارې شوی وو.

د پوليس رپورټ ترمخه، په برید کې دوه چينايان او يو بل تن د وجود ټکړې ترلاسه شوې، او څو ګاډي تباه شوي وو.

د ياد بريد زمه واري لاقانونه ګرځول شوي تنظيم بلوچستان لبرېشن ارمي، بي اېل اې منلې وه.

دغه ډله په بلوچستان صوبه کې د چینايي پانګونو مخالفت کوي، او وړاندې یې هم د پاکستان په بلوچستان د چينايانو په ګټو د حملو زمه وارۍ منلي دي.

د پاکستان وزیراعظم شهباز شريف د کراچۍ بريد غندلی او ويلي يې وو، "په دې ناوړه پېښه کې ککړپاکستانيان نه شي کېدای، بلکې د پاکستان دښمنان دي. سمدستي پلټنې پيل کړل شوي چې پېښه کې ککړ کسان معلوم او د قانون منګولو ته راوستل شي".

د پاکستان د سرکاري خبري ادارې اې پي پي ترمخه د چين سفير پاکستان کې د ترهګرۍ د مخنيوي په لړ کې د پاکستان د پوځ او پوليسو قربانۍ ستايلي، او زياته کړې یې ده، د ګډو هڅو د لارې ترهګري قابو کېدلی شي.

نوموړي د پاکستان د ترهګرۍ د مخنیوي د توان سېوا کولو دپاره د چین د پوره ملاتړ عزم څرګند کړی دی.

پاکستان کې وخت په وخت په چينايي وګړو بريدونه او چاودنې شوي دي.

د کراچۍ د بريد نه وړاندې پاکستان کې په چينايي وګړو ترسری شوی وروستی غټ بريد د روان کال په ‏‎26‎م مارچ د خېبرپښتونخوا په شانګله ضلعه کې شوی، په بشام کې د داسو ډېم په چينايي انجينيرانو ځانمرګی برید کې پينځه چينايي وګړي او پاکستانی ‏‏‏ډرايور یې پکې ‏وژل شوي وو.‏

د کال 2022م په 26 اپرېل په کراچۍ پوهنتون کې د چينايي ژبې او کلتور د زده کړو څانګې [کنفوشيس انسټيټيوټ] په چينايي استازانو ځانمرګی بريد شوی درې چينايي استازان او يو پاکستانی ډرايور ورکې وژل شوي وو.

د دغه بريد زمه واري هم لاقانونه ګرځول شوې ډلې بلوچ لبرېشن ارمي منلې او ويلي يې وو، دغه برید يې لومړۍ ښځينه فدايي شاري بلوچ کړی وو.

د یاد بريد وروسته د کنفوشيس انسټيټيوټ او پاکستان کې دغه ډول نورو مرکزونو څخه ټول چينايي استازان بيرته خپل ملک ته تللي او بيا بيرته پاکستان ته نه دي ورغلي.

بي اېل اې وايي، د بلوچستان د ازادۍ، او بلوچستان کې په قدرتي وسايلو کې د چين دپانګونو غندنه کوي.

پاکستان د اوږدې مودې نه تور لګوي هند د بلوڅ وسله والو په شا ولاړ دی، خو هند تل دغه تورونه رد کړي دي.