د تورخم د شخړې په سر جرګه شوې، خو دروازه لا هم تړلې پرته ده

د افغانستان او پاکستان ترمنځ د تګ راتګ او تجارت غټې لارې تورخم د شخړې په اړه پرون په نهم مارچ د دواړو خواو څخه د سیاسي، قبايلي او سوداګرو مشرانو ترمنځ جرګه شوې، ويل شوي د جرګې د پرمختګ په اړه نن بيا د جرګې کېدو امکان دی.

ويل شوي، پاک افغان لويه جرګه په پوله پاکستان لوري ته راجوړه شوې، پکې د افغانستان لخوا د افغانستان او ننګرهار چېمبر غړو سره سیمه ييزه مشرانو او سوداګرو ګډون کړی او پاکستان لوري نه پکې هم ځايي قبايلي او چېمبر مشرانو ګډون درلود.

د وي او اې ډيوه خبريال فريد شينواري په خبره، په تورخم د کسټم کلېرنګ ايجنټانو مشر مجيب شينواري ويلي، جرګه کې پاکستاني لوري د افغانستان لخوا د جرګې ګډونوالو ته غوښتنې وړاندې کړي دي.

ويل شوي، په غوښتنو کې په تورخم پوله افغانستان لوري ته د ودانۍ نه کولو او د دغه مسلې په سفارتي کچه هوارولو، د وړوکي اختر د 15مې ورځې پورې په سمدستي توګه د دروازې پرانستو او ډز بندۍ کولو ويل شوي دي.

او افغان لوري په ځواب کې ويلي، دغه غوښتنې به په افغانستان کې د واکمنو طالبانو د مشرانو سره شريکې کړي او نن په لسم مارچ یې هيله مندي ښودلې چې ځواب به یې ورکړي.

تورخم دروازه د فرورى 21 نېټې راهسې شپې 11 بجو نه وروسته له هغې وتړلى شوه چې پاکستاني چارواکو ويلي، افغان طالبانو په ممنوعه ځاى کې ودانۍ يا تاسيسات کول.

د پولې بنديز له امله دواړو خواو ته د زرګونو په شمېره کې مال وړونکي ګاډي ايسار پاتې او په پوله اوښتونکي راوښتونکي په لسګونو خلک د مشکلاتو سره مخ شوي دي.

په تورخم کې د پاکستان امنيتي ځواکونو او طالب چارواکو ترمنځ د لارې د خلاصېد په حقله دوه وارې، د فرورۍ په 24مه او مارچ په دويمه ناستې شوې خو کومه نتيجه یې نه ده ورکړې.

په دويم مارچ په پوله د دواړو خواو د سپکو او درنو وسلو ډزې شوې چې تر دوه ورځو روانې وې.

د پاکستان سرحدي ځواکونو او افغان طالبانو ترمنځ د مارچ په دويمه او درېيمه ترسره شوو ډزو کې پاکستان لوري ته د ايف سي ځواک شپږ عسکر ژوبل شوي وو.

افغانستان لوري ته د يو طالب وژل کېدو او څو نورو ژوبلېد خبر هم ورکړل شوی، خو د دواړو خواو څخه په رسمي توګه د مرګ ژوبلو په اړه څه نه وو ويل شوي.