د مارچ په دویمه نېټه د افغانستان ختیځ ولایت ننګرهار کې د انعکاس درې ښځینه کارکوونکې ووژل شوې. د انعکاس په کارکوونکو دا لومړی برید نه وو. له دې ترمخه په ډیسمبر میاشت کې د انعکاس خبریاله ملاله میوند ووژله.
داعش وسله والې ډلې نه یوازې د انعکاس خبریالانو بلکې په ننګرهار کې د یوې مېرمنې ډاکټرې د وژلو مسولیت منلی دی.
مرسل واحدي، سعدیه سادات او شهناز روفي په یوه ځای په جلال اباد کې د دفتر نه کور ته د تګ به غرض ووتلې خو په بېلا بېلو حملو کې ووژل شوې.
د سعدیې کورنۍ وايي چې هغې تر څوارلسمې ټولګۍ زده کړې کولې او غوښتل یې د حقوقو پوهنځی ولولي، خو د هغې معاش کم و او دغه ارمان یې پوره نشو.
سعدیه د یوې غریبې کورنۍ غړې وه او د مور د ناروغۍ لپاره یې له دفتره د دریو میاشتو پیشکي معاش هم اخیستی و چې هغه پور پرې لا هم پاتې دی.
روښان، د سعدیه ورور وايي د سعدیې د ژوند پاچاهي ريښتیا هم ړنګه شوه او په کارخونه کې یې وروستی لاسلیک هم همکارانو ته یو دردناک یادګار شو.
د نوم نه ښودلو په شرط د وژل شوو جینکیو پخوانۍ همکاره چې د امنیتي ستونزو له کبله یې خپل دنده پريښوه د خپلو وژل شوو خوندکیو په هکله وویل: " مرسل ډیره هیله لرله چې لوړې زده کړې وکړي خو دا ارمان یې ګور ته ویوړو. "
د ۲۱ کلنې مرسل پلار وحیدالله خوږګیاڼۍ وايي د هغې د همکارې ملالۍ د وژل کیدو وروسته یې ورته د کار پریښودو وویل خو هغې انکار وکړ. "د مرسل جانې هیله وه چې یوه خبریاله شي او د دې لپاره یې زده کړې وکړې او بیا یې انعکاس کې کار پېل کړ".
همداراز په جلال اباد کې د مارچ په څلورمه نیټه یوه ډاکټره ووژل شوه چې هم ذمه واري یې داعش په غاړه واخیسته.
تېر کال هم ګڼ شمېر نورې داسې فعالې مېرمنې ووژل شوې لکه د افغانستان د بشري حقونو د خپلواک کمېشن کارکوونکې فاطمه نتاشا خلیل، جنرل شرمیلا فروغ چې د ملي امنیت د جنډر څانګې مشره وه او ډېره موده یې د تښتونو په ضد څانګه کې او د جرایمو د نیټورک په ضد کار کړی وو، مریم نورزاد ده چې د دایې یا قابلې په توګه یې په وردګو او بامیانو ولایتونو کې کار کړی وو، 23 کلنه افسره فاطمه رجبي، 35 کلنه فرشته ده چې په کندهار کې یې د زندان د محافظې په توګه کار کاوه او د جمهوریت لپاره کارکونکې 29 کلنه فرشته کوهستانۍ چې کاپیسا ولایت کې ووژل شوه.
پر ښځو د بریدونو دا لړۍ نه یوازې په افغانستان کې روانه بلکې په دې وروستیو کې د افغانستان پولې سره نژدې د پاکستان په خېبر پښتونونخوا صوبه کې هم هدفي وژنې ډېرې شوي او دا وژنې یو بل ته ډیر ورته والی هم لري.
د فبرورۍ په ۲۲ نیټه په شمالي وزیرستان کې د یوې غیر دولتي موسسې څلور ښځینه کارکوونکې د وسلوالو په ډزو ووژل شوې.
د دې ښځو نومونه ناهید، ارشاد، جویریه او عایشه ښودل شوي دي. د راپور له مخه چې دا مېرمنې ټولې د بېوزله کورنیو وې او په ورځنۍ مزدورۍ یې یوې موسسې سره کار کاوه. دوی په سیمه کې ځایي ښځو او نجونو ته د خیاطۍ، لاسي صنایعو او سینګار برخه کې روزنه ورکوله.
که څه هم د ځینو پېښو مسولیت د داعش وسله والې ډلې په غاړه اخیستی خو زیاتره د داسې پېښو مسولیت هم څوک په غاړه نه اخلي.
