په بلوچستان کې روغتيايي چارواکي وايي، چې له پوليو وېکسين د انکاري خلکو د اماده کولو لپاره د ديني عالمانو ترڅنګ قبايلي مشران هم د پوليو ټيمونو مرسته کوي چې انکاري خلک د پوليو وايرس له منفي اغېز او د وېکسين له ارزښته خبر کړي او د هر ماشوم پوري د پوليو قطرې ورسېږي.
د صوبې په مرکز کوټه کې چې پښتانه، بلوڅان، هزاره ګان او پنجابي ژبه ويونکي خلک مېشت دي او چارواکي وايي په هره سيمه کې د هغې ژبې ويونکي کارکوونکي ماشومانو ته قطرې ورکوي چې د پوليو ويکسين کار په سمه توګه سرته ورسېږي.
شازيه په کوټه کې د پولیو ضد کېمپېن کې کار کوي، وايي ځيني کورونه داسي وي چېري چې ماشومان رفيوزل يا ماشومانو ته د وېکسین انکاريان موجود وي او دغه ډول کسان د سيمې د سپروايزر، پوليس او يا هم د سيمې د قبايلي خلکو په مرسته قانع کېږي. " موږ ميندو ته په مورنۍ ژبه د پوليو په اړه مالومات ورکوو او د پوليس په بدرګه کار اوس اسانه شوی او موږ هيڅ وېره نه احساسه وو."
د سيمې پوليو کارکوونکي وايي چې دوی د پوليس په مرسته زياتره انکاري خلک اماده کوي.
ځايي اوسېدونکی او د سرپره قبيلې مشر سليم سرپره وايي چې د پوليو وايرس خطرناک اغېز او د وېکسين ارزښت ته په پام سره دوی د هغه چا کورونه ته ورځي چې انکاري وي، ځکه چې که ماشوم يوار پوليو شي نو بيا يې هيڅ علاج نه کېږي.
سلیم وویل "زه د سرپره قبيلې مشر يم، دلته چې هرڅوک خپل ماشومان نه ويکسين زه د هغه چا کور ته ورځم. موږ تل له پوليو ټيمونو سره په پوليو کيمپېنونو کې مرسته کوو. دا زموږ د ټولنې د هر فرد ذمه واري ده، “چې ماشومان له فلج کوونکې پوليو ناروغۍ خوندي وساتو."
په بلوچستان کې په تېرو دوو کلونو کې د پوليو مثبت کېس نه دی رپوټ شوی.
د صوبې چارواکي ديني عالمان، قبايلي مشران او مدني فعالان له پوليو کارکوونکو سره مرسته کوي اود کوښښونو په نتيجه کې يې له ويکسين د انکاري خلکو شمېر په کمېدو دی.
