د پاکستان د بهرنیو چارو وزارت په یو بیان کې ویلي، په نوي ډلي کښې د پاکستان سفارتي عمله د هند د دولتي ادارو د چارواکو لخوا باقائده ځورول کیږي، د دوی د ویرولو هڅې کیږي او د تاوتریخوالي هڅې پرې شوې دي.
هند وايي، د پاکستان د دې تورونو کره پلټنې به کوي خو زیاتوي په اسلام اباد کښې هندي سفارتکارانو سره د پاکستاني استخباراتي ادارو لخوا د تیر یو کال راهیسې هم دا ډول بده رویه روانه ده.
د پاکستان خارجه وزارت لخوا په دې اړه خپور شوي بیان کښې یو شمیر داسې پېښې په گوته شوي په کومو کښې چې د پاکستاني چارواکو ترمخه ورسره نوي ډلې کښې د هندي چارواکو لخواه بد چلند شوی دی.
د پاکستان بیان وايي "د سفارتي عملې د ځورونې دا یواځنۍ پېښه نه ده او هندي استخباراتي مامورین د پاکستاني سفارتي عملې کورنیو او ماشومانو سره هم ناروا سلوک کوي".
بیان زیاتوي، د نهې په ورځ د پاکستان سفارت یو گاډی چې د عملې ماشومان په کښې سکول ته روان وو نامعلومه کسانو په لاره کښې درولې، د دوي عکسونه او وډیوگانې یې جوړې کړي او ګواښونه یې ورته کړي دي.
پاکستانې خارجه وزارت وايي، د هند په نوي ډلي کښې د دوي سفارتي عملې سره د مارچ میاشت په نهمه او اتمه نېټه هم داسې سلوک شوی او عمله یې نامعلومه وسله والو د گاډي نه په زوره کوزه کړې وه.
پاکستان وايي، اسلام اباد کښې د هند ستر سفارتکار یې خارجه وزارت ته راغوښتې او ورته یې په یاده پیښه احتجاج کړیدی.
د پاکستان پلازمېنه اسلام اباد کښې هندي سفارتي عمله هم دا ډول تورونه په پاکستاني استخباراتي ادارو لگوي.
د مطبوعاتي رپوټونو ترمخه هندي چارواکي وايي، دوي پسې باقائده څارنه کیږي، د دوي د استوگنې ځایونه خوندي ندي او د پاکستان استخباراتي ادارو کسان د دوي وډیو گانې جوړوي.
هندي چارواکي وايي، په تېره موده کښې په پاکستان کښې د یو هندي چارواکي د کور نه د ده لپ ټاپ کمپوټر نامعلومو کسانو پټ کړېدی.
په سفارتي تعلقاتو کې د کال ١٩٦١ ویانه نړیوال قانون په کوربه هیوادونو کښې د سفارتي عملې خونديتوب او د دوي لپاره ازادي یقیني کوي.
د ویانه کنونشن په نوم دې قانون باندې د نړۍ ١٩١ هیوادونه متفق دي او دا مني، چې سفارتکار به په کوربه هیوادونه کښې نه ځورول کیږي نه به هم په پټه د دوي د خبرو د اورېدو هڅه کیږي.
په کال ١٩۴٧ کښې د برطانیې نه د ازادۍ وروسته هند او پاکستان تر دې دمه درې غټ جنگونه او یو شمېر جگړې کړې دي.
دا مهال هم د دواړو هیوادونو اړیکي سخت کړکېچ لري.
د کال ٢٠١٦ اکټوبر په میاشت کښې د هند حکومت په نوي ډلي کښې د پولیسو لخوا د پاکستاني سفارت د یو چارواکي محمود اختر د نیولو وروسته د جاسوسۍ په تور د هند نه د شړلو فیصله کړې وه.
د دې پیښې څو ورځې وروسته پاکستان هندي سفیر خارجه وزارت ته را وغوښتو او ورته یې اسلام اباد کښې د یو هندي سفارتکار سرجیت سنگ د جاسوسۍ په تړلو د پاکستان نه د شړلو فیصله واوروله.
پاکستان دریځ دا و چې یاد سفارتکار د ویانه سفارتي قانون سرغړونه کړیده او د سفارتي آدابو خیال یې ندی ساتلی.
کال ٢٠١٧ کښې هند نړیوال عدالت کښې په پاکستان کې د کلبوشن یادیو نومي هندي وگړي ته د مرگ سزا ورکولو پر خلاف مقدمه هم کړې وه.
هند کلبوشن یو عادي تن بولي ولې پاکستان وايي، دی د هندي سمندري پوځ یوافسر دی او د پاکستان بلوچستان صوبې ته د جاسوسۍ او اړي گړي جوړولو لپاره راغلې وو.
دواړه اټومي وسله لرونکي گاونډیان د کشمیر په لانجمنه پوله هم یو بل سره تاو تریخوالی لري او په وروستیو کښې په یو بل د ډزو پیښې زیاتې شوي، چې پکښې زیاتره مرگ ژوبله عادي خلقو ته اوړیدلې ده.
دواړو هیوادونو په تیرو ورځو کښې یو بل سره د ښځينه بندیانو، ذهني ناروغانو او د ٧٠ کالو نه زیات عمر لرونکو بندیانو په تبادلې باندې هم موافقه کړې ده.
